Moynaq rayonında Jańa jıl bayramı aldınan jáne bir quwanıshlı waqıya júz berdi. Atap aytqanda, Sartay Darkenovqa barlıq zamanagóy sharayatlarǵa iye jańa 2 bólmeli úydiń gilti saltanatlı túrde tapsırıldı.

Saltanatlı máresimge rayon hákimi B.Menglibekov, rayonlıq ishki isler bóliminiń baslıǵı J.Yusupov, “Insan” sociallıq xızmetler orayınıń juwapkerleri hám keń jámiyetshilik wákilleri qatnastı.
Bul iygilikli baslama elimizde insan qádiri eń joqarı qádiriyat ekeni, ásirese, jaslar hám sociallıq qorǵawǵa mútáj insanlarǵa bolǵan itibar mámleketlik siyasattıń tiykarǵı baǵdarına aylanǵanınıń jáne bir ayqın kórinisi bolıp esaplanadı.
Jańa jıl aldınan sawǵa etilgen bul imarat tek ǵana jańa mákan emes, al jańa úmitler, jańa arzıwlar hám keleshekke bolǵan bekkem isenimniń belgisi bolıp esaplanadı.
Bayram keypiyatı, qızǵın qutlıqlawlar hám jaqsı tileklerge bay bul ilaj kewillerge quwanısh baǵıshladı. Elimizde miyrim-shápáát, ǵamqorlıq hám adamgershilik qádiriyatları barǵan sayın bekkemlenip atırǵanı mine, usınday sawaplı islerde ayqın kózge taslanbaqta.

Qaraqalpaqstan xabar agentligi