Donald Tramptıń Ózbekstan Respublikası Prezidenti Shavkat Mirziyoev penen telefon arqalı sóylesiwi Amerika – Ózbekstan qatnasıqlarınıń turaqlı unamlı dinamikasın tastıyıqlaytuǵın áhmiyetli siyasiy signal bolıp esaplanadı. Joqarı dárejedegi tikkeley baylanıslar AQShtıń Ózbekstanǵa Oraylıq Aziyadaǵı jetekshi sherik sıpatında itibarı artıp atırǵanı hám Tashkenttiń regionallıq hám keń túrde xalıqaralıq kún tártibindegi roli tán alınıp atırǵanın sáwlelendiredi.

Sońǵı jılları Ózbekstan hám Qurama Shtatlar arasındaǵı ekonomikalıq birge islesiw waqtı-waqtı menen bolatuǵın baylanıslardan sistemalı sheriklikke aylandı. Mámlekette Amerika kapitalı hám texnologiyalarınıń qatnasıwında onlaǵan joybarlar, tiykarınan, sanaat, awıl xojalıǵı, transport hám sanlı ekonomika tarawlarında ámelge asırılmaqta. Qurama Shtatlar aldınǵı texnologiyalar hám basqarıw ámeliyatlarınıń jetekshi dereklerinen biri bolıp, bul Ózbekstan ekonomikasın modernizaciyalaw hám onıń básekige shıdamlılıǵın arttırıw ushın ayrıqsha áhmiyetke iye.
Siyasiy sóylesiw de mazmunlı túske endi. Vashington Ózbekstandaǵı ekonomikalıq reformalar, investiciyalıq ortalıqtı jaqsılaw hám ashıq-aydınlıq siyasatın izbe-iz qollap-quwatlap kelmekte. Tashkenttiń Oraylıq Aziyada turaqlılıqtı támiyinlew, regionallıq birge islesiwdi rawajlandırıwdaǵı konstruktivlik roline joqarı baha berilmekte.
Ózbekstan Prezidentiniń Mayami qalasında bolıp ótetuǵın “Úlken jigirmalıq” sammitine tariyxta birinshi márte miyman sıpatında mirát etilgeni ayrıqsha áhmiyetke iye. Bul tek ǵana diplomatiyalıq belgi emes, al mámlekettiń xalıqaralıq statusı sapa jaǵınan ózgergeni, Prezident basshılıǵında ámelge asırılıp atırǵan reformalarǵa isenim artıp atırǵanınan derek beredi.
“Jigirmalıq” mámleketleri jáhán jalpı ishki óniminiń derlik 85 procentin, jáhán sawdasınıń derlik 75 procentin hám planetamız xalqınıń derlik úshten eki bólegin quraydı. Áne usı formatta jáhán ekonomikası, finanslıq turaqlılıq, energetika hám azıq-awqat qáwipsizligi, támiynat shınjırları hám turaqlı rawajlanıw máseleleri boyınsha óz-ara muwapıqlasqan kózqaraslar qáliplestirilmekte.
Ózbekstannıń “Úlken jigirmalıq”taǵı qatnasıwı investiciyalardı tartıw, sawda-ekonomikalıq baylanıslardı keńeytiw, mámlekettiń global óndiris hám logistika shınjırlarına integraciyalanıwı ushın qosımsha imkaniyatlar ashadı. Keń mániste, bul jáhán hám regionallıq ekonomikanıń keleshegine tikkeley tásir etetuǵın qararlardı dodalawda Ózbekstannıń dawısın kúsheytedi.
Usı mániste, Donald Tramptıń Prezident Shavkat Mirziyoev penen telefon arqalı sóylesiwi hám G20 sammitine mirát etiwin Ózbekstan – Amerika strategiyalıq birge islesiwin bunnan bılay da tereńlestiriwge – ekonomikalıq baylanıslar hám investiciyalardı keńeytiwden baslap, tiykarǵı regionallıq hám globallıq máseleler boyınsha poziciyalardı muwapıqlastırıwǵa tayarlıq belgisi sıpatında bahalaw kerek.

Eldor ARIPOV,
Ózbekstan Respublikası Prezidenti janındaǵı
Strategiyalıq hám regionlararalıq izertlewler institutınıń direktorı.
ÓzA