Respublikamızdıń barlıq aymaqlarında bolǵanı sıyaqlı, Nókis qalasındaǵı “Imkan” reabilitaciya orayına iye mámleketlik kóp tarmaqlı qánigelestirilgen mektepke shekemgi bilimlendiriw shólkeminde jańa jıl bayramı keshesi bolıp ótti.

Ilajǵa Qaraqalpaqstan Respublikası Ministrler Keńesiniń Baslıǵı F.Ermanov qatnasıp, oray jámááti hám onda tárbiyalanıp atırǵan balalardı jańa jıl bayramı menen qızǵın qutlıqladı hám olarǵa húrmetli Prezidentimizdiń sawǵaların saltanatlı túrde tapsırdı.
Bayram ilajında balalardıń quwanıshı, olardıń keleshegine bolǵan isenimin bekkemlew, mehir-múriwbet hám itibar ortalıǵın jaratıw áhmiyetli ekenligi, mámleketimiz Prezidentiniń turaqlı itibarı hám ǵamqorlıǵı nátiyjesinde respublikamızda balalardıń máplerin qorǵaw, olardıń tálim-tárbiyası hám salamat rawajlanıwı ushın keń imkaniyatlar jaratılıp atırǵanı atap ótildi.
Ilaj dawamında shólkemniń kórkem ónerge qızıǵıwshı tárbiyalanıwshıları tárepinen bayramǵa arnalǵan koncert baǵdarlaması qoyıp berildi. Ótkerilgen bul ilaj Jańa jıl bayramın kóterińki ruwxta kútip alıw balalardıń kewlinde jaqsılıq hám isenim sezimlerin jáne de bekkemlewge xızmet etti.

Qaraqalpaqstan xabar agentligi