Mámleketimizde barlıq tarawlar qatarında sport tarawına da ayrıqsha itibar qaratılıp, jaslardı sportqa keńnen tartıw, olar arasınan elimiz dańqın dúnyaǵa tanıtatuǵın sportshılardı jetilistirip shıǵarıw jańa basqıshqa kóterilmekte.

Bul baǵdarda Ózbekstan Respublikası Prezidentiniń ayrıqsha mehiri hám itibarı menen Qaraqalpaqstanda ámelge asırılıp atırǵan jumıslardı atap ótetuǵın bolsaq, 14 mlrd. sum qarjı tiykarında Nókis Olimpiya hám Paralimpiya orayında qurılıs jumısları alıp barılmaqta. 107 mlrd. sum qarjı esabınan «Turan» futbol stadionında da rekonstrukciya jumısları júrgizilmekte. Bunnan tısqarı, paytaxtımızda Gúres sheberligi mektebi paydalanıwǵa tapsırıldı.
Mine usınday iygilikli jumıslar qatarında Gimnastika orayınıń ashılıwın aytıp ótsek boladı.
Oraydıń ashılıw máresiminde Qaraqalpaqstan Respublikası Joqarǵı Keńesiniń Baslıǵı Amanbay Orınbaev, nuranıy-aqsaqallar, belsendi hayallar hám keń jámiyetshilik wákilleri qatnastı.
Ilajda atap ótilgenindey, derlik 80 mlrd. sum qarjı esabınan zamanagóy kóriniste qurıp pitkerilgen bul obektte sportshı jaslar ushın barlıq qolaylı sharayatlar jaratılıp, oray zárúrli ánjamlar menen tolıq támiyinlendi.
Álbette, usınday zamanagóy sport orayınan keleshekte elimizdi dúnyaǵa tanıtatuǵın Aziya, jáhán hám Olimpiada chempionları jetilisip shıǵadı.

Qaraqalpaqstan xabar agentligi