Ózbekstan Respublikası Prezidentiniń Qaraqalpaqstan Respublikasın sociallıq-ekonomikalıq rawajlandırıw, aymaqta jumıs alıp barıwshı isbilermenlerdi qollap-quwatlaw hám olarǵa qolaylı sharayatlar jaratıp beriw boyınsha shıǵarǵan arnawlı párman hám qararları tiykarında, respublikamızda kóplegen unamlı isler ámelge asırılmaqta. Jurtbasshımız tárepinen ózlerine jaratılǵan usınday qolaylılıqlardan nátiyjeli paydalanıp kiyatırǵan respublikamız isbilermenleri tárepinen bir qatar óndiris, sociallıq hám xızmet kórsetiw obektleri iske túsirilip, xalıq iygiligi ushın paydalanıwǵa tapsırılmaqta.
Usınday jańa obektlerdiń biri «Ramada» miymanxanası paytaxtımızda qurılıp, jańa jıl aldında paydalanıwǵa tapsırıldı.
Miymanxananıń ashılıw máresimine Qaraqalpaqstan Respublikası Joqarǵı Kenesiniń Baslıǵı Amanbay Orınbaev qatnasıp, ilaj qatnasıwshıların zamanagóy xızmet kórsetiw obektiniń paydalanıwǵa tapsırılıwı menen qızǵın qutlıqladı.
Atap ótiw orınlı,«Karakalpak Palace» jámiyeti tárepinen xalıqaralıq «Ramada by Wyndham» brendi menen 10 mln. dollar qarjı esabınan qurılǵan miymanxana iske túsiwi menen onda bir waqıttıń ózinde 200 miymandı qabıllaw imkaniyatı jaratıldı.
Bul jańa turizm obektinde xalqımız ushın, sonday-aq, jergilikli hám sırt elli miymanlar ushın barlıq qolaylı sharayatlar jaratılǵan.
Saltanatlı ashılıw máresiminen soń nuranıy-aqsaqallar hám keń jámiyetshilik wákilleri miymanxanada jaratılǵan sharayatlar menen jaqınnan tanıstı.

Qaraqalpaqstan xabar agentligi