Hár jılı mámleketimiz boylap Jańa jıl bayramı qarsańında erteńgi keleshegimiz iyeleri bolǵan balalarǵa bayram keypiyatı inám etilip, «Prezident sawǵaları»n tapsırıw dástúrge aylanǵan.

Qaraqlpaqstan Respublikası Joqarǵı Keńesi Baslıǵı Amanbay Orınbaev Nókis qalasındaǵı «Kishi kólemli balalar úyi»nde tárbiyalanıp atırǵan balalarǵa Prezident sawǵaların tapsırıw hám jańa jıl bayramı menen qutlıqlaw ushın bardı.
Respublikamız basshısı bayramǵa say shıraylı etip bezelgen Shırsha átirapında balalardı jańa jıl menen qutlıqlap, olarǵa Prezident sawǵaların tapsırdı. Sonıń menen birge, balalar úyinde jaratılǵan sharayatlardı kózden ótkerip, onda tárbiyalanıp atırǵan balalardıń búgingi jaǵdayları menen tanıstı.
Atap ótiw orınlı, bul «Kishi kólemli balalar úyi» Sociallıq qorǵaw milliy agentligi tárepinen jetim hám ata-ana qaramaǵınan ayırılǵan balalardı shańaraqlıq ortalıqta tárbiyalaw hám olardıń baxıtlı turmısın támiyinlew maqsetinde shólkemlestirilgen bolıp, balalar ushın barlıq qolaylı sharayatlar jaratılǵan.

Qaraqalpaqstan xabar agentligi