Sońǵı jılları húrmetli Prezidentimizdiń Qaraqalpaqstanǵa bolǵan ayrıqsha itibarı nátiyjesinde xalqımız iygiligi jolında elimizde keń kólemli ilajlar alıp barılıp, respublikamız turmısında kóplegen jańalıqlar júz berip atır.

Mine usınday quwanıshlı waqıyalardan biri sıpatında Jańa jıl bayramı qarsańında búgin Nókis qalasında Gúres sheberligi mektebiniń ashılıw saltanatı ótkerildi.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, Prezidentimizdiń tapsırması menen qurılǵan jańa obekt paydalanıwǵa tapsırılıwı múnásibeti menen jıynalǵanlardı qutlıqladı.
Atap ótilgenindey, búgingi kúnde dene tárbiya hám sporttı rawajlandırıwǵa, jaslardı sportqa keńnen qamtıp alıwǵa ayrıqsha itibar qaratılıp, bul baǵdarda keń kólemli ilajlar ámelge asırılmaqta. Mine usınday ámeliy jumıslar qatarında 16 mlrd. sum qarjı tiykarında gúres sheberligi mektebi jańadan qurılıp pitkerildi hám zárúr inventarlar menen tolıq támiyinlendi. Usı tiykarda 150 den aslam jaslar ushın sporttıń milliy gúres, erkin gúres hám grek-rim gúresleri menen turaqlı shuǵıllanıwı ushın barlıq zárúr sharayatlar jaratıldı.
Álbette, jańadan paydalanıwǵa tapsırılǵan bul obekt uzaq jıllar dawamında xalqımızǵa xızmet etedi hám bul orınnan elimiz bayraǵın dúnyaǵa tanıtatuǵın kóplegen jaslarımız jetilisip shıǵadı.

Qaraqalpaqstan xabar agentligi