Respublikamızda xalıqtıń ishimlik suwı támiynatın jaqsılaw arqalı xalıqqa múnásip turmıs sharayatların jaratıw maqsetinde keń kólemli jumıslar ámelge asırılmaqta.

Bunıń nátiyjesinde búgingi kúnde respublikamız xalqınıń oraylasqan ishimlik suwı menen támiyinlengenlik dárejesi 74,2 procentti, aqaba suw xızmeti menen qamtıp alınǵanlıq dárejesi 5,4 procentti quramaqta.
«Qaraqalpaq suw támiynatı» akcionerlik jámiyetinde ǵalaba xabar quralları wákilleriniń qatnasıwında baspasóz konferenciyası ótkerilip, onda jámiyet direktorı Q.Xalmuratov respublikamızda ishimlik suwı támiynatın jaqsılaw maqsetinde 2025-jılda ámelge asırılǵan jumıslar hám aldaǵı rejeler boyınsha maǵlıwmat berdi.
– Búgingi kúnde Qaraqalpaqstan Respublikasında ishimlik suw támiynatı hám aqaba suw sistemaların rawajlandırıw boyınsha xalıqaralıq finans institutlarınıń qatnasıwında ulıwma bahası 223,0 mln. dollarlıq 2 investiciyalıq joybar ámelge asırılmaqta, – deydi Q.Xalmuratov.
Atap aytqanda, Aziya rawajlanıw bankiniń qatnasıwında bahası 145,0 mln. dollarlıq “Ózbekstannıń batıs bóleginde ishimlik suwı támiynatı sistemaların rawajlandırıw” joybarı ámelge asırılıp, házirgi waqıtta Qaraózek, Beruniy, Ámiwdárya hám Moynaq rayonlarında suw bólistiriw qurılmaları hám suw tarmaqların qurıw jumısları jáne Ámiwdárya rayonındaǵı quwatlılıǵı 40 000 m3/sutka. bolǵan “Mańǵıt” suw tazalaw qurılmasın qurıw jumısları alıp barılmaqta.
Prezidentimizdiń 2022-jıl 22-yanvardaǵı arnawlı qararı tiykarında Nókis qalasında jaylasqan “Nókis” suw tazalaw tarnawın rekonstrukciyalaw” joybarı ámelge asırıldı.
Joybar sheńberinde kanaldan suw alıw qurılmasına 14 qazıq (svay) qaǵılıp, 0,210 kilometrlik texnologiyalıq qubır tartıldı hám 2-kóterme nasos stanciyasına 4 nasos úskeneleri ornatıldı. Úsh gorizontal suw tındırǵıshı tazalanıp, oǵan 0,265 kilometrlik texnologiyalıq qubırlar tartıldı. 14,2 mıń m3 lik 2 jańadan qurılǵan suw tındırǵıshta texnologiyalıq metal qubırlar tartıldı hám suw tındırǵısh qurıldı. 23 mıń jańa farsunka úskeneleri alıp kelinip, 150 metr pulpovod alıp kelindi. Bar hám jańadan qurılǵan qurılmalardı elektr menen támiyinlew jumısları ámelge asırıldı.
Nátiyjede, aldın «Nókis suw tazalaw» qurılmasında ulıwma quwatlıǵı sutkasına 60 mıń kub metr suw jetkerip beriw imkaniyatı bolǵan bolsa, Prezidentimizdiń arnawlı qararı menen 74,9 mlrd. sum qarjı tiykarında rekonstrukciyalaw jumısları alıp barılıp, bul kórsetkish 90 mıń kub metrge jetkerildi. Al, xalıqtı taza ishimlik suwı menen qamtıp alıw 279 mıńnan 340 mıń puqaraǵa jetkerildi.
Sonday-aq, Prezidentimizdiń 2019-jıl 9-apreldegi PQ-4271 sanlı qararına muwapıq, Nókis rayonınıń ishimlik suwı támiynatın jaqsılaw maqsetinde Aziya rawajlanıw bankiniń 11,4 mln. dollarlıq qarjıları esabınan qurılıs jumısları alıp barıldı.
Joybar sheńberinde 263 kilometrlik ishimlik suwı tarmaqlarınıń tartılıwı arqalı 31 mıńnan aslam adamnıń taza ishimlik suwı menen támiyinleniwi jaqsılanıwına erisildi. Sonday-aq, «Mádeniyat», «Abadan», «Kerder» nasos stanciyaları qurılıp, rayonlıq suw támiynatı kárxanasınıń eki qabatlı jańa imaratı, barlıq zamanagóy ásbap-úskeneler menen támiyinlengen laboratoriya qurıp pitkerildi.
Ámelge asırılǵan jumıslar nátiyjesinde 4000 nan aslam puqara birinshi márte ishimlik suwı menen támiyinleniwge erisildi.
Maǵlıwmat retinde atap ótetuǵın bolsaq, rayon xalqın ishimlik suw menen támiyinlew dárejesi aldınǵı 68,4 procentten 90 procentke jetkeriliwine erisildi.
Bunnan tısqarı grant qarjıları tiykarında alıs awıllarda jasawshı xalıqtıń ishimlik suwı támiynatı jaqsılandı.
Birlesken Milletler Shólkeminiń Rawajlandırıw fondı (BMShRF) nıń «Klimatqa shıdamlı awıl xojalıǵı arqalı Aralboyı regionında turaqlılıqtı qollap-quwatlaw» xalıqaralıq joybarı sheńberinde 131 mıń AQSh dolları muǵdarındaǵı grant qarjıları tiykarında Kegeyli rayonı Abat awıl puqaralar jıyını aymaǵındaǵı suw dushshılandırıw stanciyasında rekonstrukciyalaw jumısları alıp barıldı.
Joybar sheńberinde suw stanciyası jańalanıp, onıń quwatlılıǵı 12 kub metrge jetkerildi. Búgingi kúnde jańa suwdı dushshılandırıw stanciyası paydalanıwıǵa tapsırıldı hám bul arqalı aymaqtaǵı 250 xojalıqtaǵı 1250 adamnıń taza ishimlik suwı menen turaqlı támiyinleniwine erisildi.
Qaraózek rayonındaǵı Qoybaq APJ aymaǵında búgingi kúnde 236 shańaraqta 1050 den aslam adamnıń ishimlik suwı támiynatı jaqsılandı.
“Wzsuvtaminot” AJ esabınan usı aymaqtıń ishimlik suwı támiynatın jáne de jaqsılaw maqsetinde joybar bahası 660 mln. sumlıq qarjı ajıratıldı. «Gúzbergen» awılına quwatlılıǵı 1 m3/saat, «Daǵar» awılına 0,5 m3/saat hám «Xoja» awılına 0,5 m3/saat.lıq 3 dana jańa suwdı dushshılandırıwshı úskeneler qurıldı.
Bulardıń barlıǵı xalqtı taza ishimlik suwı menen támiyinlewge qaratılǵan jumıslardıń ayqın dálili esaplanadı.
Sonday-aq, Prezidentimizdiń arnawlı arnawlı qararı tiykarında, Aziya rawajlanıw bankiniń qatnasıwındaǵı “Ózbekstannıń batıs bóleginde ishimlik suwı támiynatı sistemaların rawajlandırıw” joybarı boyınsha Qaraózek, Beruniy, Ámiwdárya hám Moynaq rayonlarında suw bólistiriw qurılmaları hám suw tarmaqların qurıw jumısları alıp barılmaqta.
Búgingi kúnde jámi 9 qurılıs paketinen 2 paket boyınsha qurılıs jumısları juwmaqlandı, 6 paket boyınsha jumıslar dawam etpekte, qalǵan 1 paket boyınsha tender processleri ámelge asırılmaqta.
Baspasóz konferenciyasında qatnasıwshılar qánigelerden ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.
M.Habibullaevtıń túsirgen súwretleri