Nókis qalasındaǵı payızlı orınlardıń birinde “Húrmet-2025” sıylıqlaw máresimi ótkerildi.

Sıylıqlaw máresiminde qala hákimi A.Daniyarov shıǵıp sóylep, jıynalǵanlarǵa paytaxtımızdaǵı bolıp atırǵan jetiskenliklerdi, jańalanıwlardı atap ótti.

Atap ótilgenindey, Prezidentimizdiń Qaraqalpaqstanǵa degen joqarı itibarı menen ótken jıllar ishinde on besten aslam tariyxıy párman hám qararlardıń qabıl etiliwi  xalqımızdıń búgingi turmısınan razılıǵın támiyinlewge qaratılǵan jumıslarǵa bekkem tiykar bolıp xızmet etpekte.

Ótkerilgen saltanatlı ilajda mákan puqaralar jıyınları aymaǵındaǵı iygilikli isleri menen túpkilikli ózgerislerde ayrıqsha belsendilik kórsetip atırǵan qalalıq mákemeler menen shólkemler,  “Máhálle jetiligi” wákilleriniń bir toparı sıylıqlandı.

– Jurnalistler jaqsı gáptiń qulı. Azǵana marapattıń ózi bizlerge qanshama kúsh-quwat beredi. Nókis qalası hákimligi tárepinen ótkerilgen “Húrmet-2025” – jıldıń eń belsendilerin sıylıqlaw máresiminde azı-kem miynetlerimizdi bahalap, «Belsendi jurnalist» nominaciyası menen sıylıqlawınan rası tóbem kókke jetti. Usı ilajdı shólkemlestiriwshilerge óz minnetdarshılıǵımdı bildiremen, – deydi Qaraqalpaqstanǵa miyneti sińgen jurnalist M.Qutlımuratov.

Dóretiwshi kásipleslerime bildirgen jıllı tilekleri, jaqsı pikirleri ushın minnetdarman. Awızbirshiligimizge kóz tiymesin! Kirip kiyatırǵan jańa jıl xalqımız ushın bunnan da kóp jetiskenliklerge, tabıslarǵa bay jıl bolsın.

Ilaj koncert baǵdarlaması menen dawam etti.

Á.Jiyemuratov,

Qaraqalpaqstan xabar agentligi