Jańa jıl balalardıń eń súyikli bayramı. Ásirese, hár jılı ótkeriletuǵın “Prezident arshası” ilajı balalardıń júreginde umıtılmas estelikler qaldıradı.

Usı bayram sheńberinde mehirge mútáj balalarǵa ǵamxorlıq kórsetiw maqsetinde Sociallıq qorǵaw milliy agentligi tiyisli ministrlikler hám uyımlar menen birgelikte bir qatar jumıslardı ámelge asırmaqta. Usı jılı da dástúrge muwapıq, mámleketimiz boylap balalar ushın Prezident sawǵaları tayarlandı. Olar orınlardaǵı Mehriybanlıq hám Múriwbet úyleri tárbiyalanıwshıları, “SOS O‘zbekiston bolalar mahallalari”, Náresteler úyleri, shańaraqlıq balalar úyleri tárbiyalanıwshıları, ata-ana qaramaǵınan ayırılǵan balalar, sonday-aq, eldiń tınıshlıǵı jolında qaytıs bolǵan huqıq qorǵaw uyımları xızmetkerleriniń perzentlerine mólsherlengen.
Prezident sawǵaları quramınan 24 túrdegi oqıw quralları hám 34 túrdegi mazalı zatlar orın alǵan bolıp, olar balalardıń bilim alıwǵa bolǵan qızıǵıwshılıǵın arttırıw, bayram keypiyatın jáne de kóteriwge xızmet etedi. Házirgi kúnlerde respublikanıń barlıq aymaqlarına sawǵalar kárwanı jetip barmaqta. Mine, usınday quwanıshlı mánzillerden biri Tashkent wálayatı boldı.
– Jańa jıl bayramı hár jılı óziniń jarqın estelikleri hám qızǵın sezimleri menen hámmeniń yadında qaladı. Ásirese, balalar bul bayramdı asıǵıp kútedi. Hár jılı Prezidentimiz tárepinen mehirge mútáj balalar ushın sawǵalar tapsırıladı. Bıyıl da bul jaqsı dástúr dawam ettirilip, sawǵalar balalarǵa jetkeriledi. Bul baslama balalarǵa bolǵan itibar hám ǵamqorlıqtıń jáne bir ayqın úlgisi bolıp esaplanadı.
Jańa jıl aldınan berilgen Prezident sawǵaları bolsa balalardıń qálbinde quwanısh, isenim hám jıllı estelikler oyatadı, – deydi Sociallıq qorǵaw milliy agentligi Tashkent wálayatı basqarmasınıń baslıǵı Miraziz Mirsultanov.

Abdulaziz MUSAEV,
ÓzAnıń xabarshısı