Qaraqalpaqstan Respublikası Joqarǵı Keńesiniń Baslıǵı Amanbay Orınbaev máhálle hám awıllardaǵı keywanı analar hám belsendi hayallar menen ushırastı.

Onda dáslep, Prezidentimizdiń basshılıǵında tek ǵana Qaraqalpaqstan ushın 2017-jıldan berli 78 párman hám qarar qabıl etilip, házirgi waqıtta 38 hújjettiń orınlanıwı dawam etip atırǵanı, sonıń menen birge, usı hújjetler arqalı berilgen jeńillikler haqqında keń túrde atap ótildi. Ushırasıwda sonday-aq, ótken qısqa waqıt ishinde Qaraqalpaqstan tariyxı betlerinde ózine tán orın alǵan áhmiyetli jańalıqlar, búgingi kúnde ámelge asırılıp atırǵan keń kólemli iygilikli jumıslar, aldaǵı wazıypalar haqqında sóz etildi.
Sonı da ayrıqsha aytıw kerek, jaqın qısqa waqıt ishinde Qaraqalpaqstanda shın mánisinde tariyxıy waqıyalar júz berdi. Tek ǵana Qaraqalpaqstan xalqı, isbilermenleri, xalıqtıń barlıq kategoriyaları ushın aldın bolmaǵan jeńillikler, kóplegen imkaniyatlar jaratıp berildi.
Usı tiykarda Jańa Ózbekstan menen birge Jańa Qaraqalpaqstandı qurıw boyınsha úlken dóretiwshilik jumısları dawam ettirilmekte.
Ushırasıwda mine, usınday iygilikli ilajlar keń túrde sóz etildi.
Ushırasıw dawamında bir topar belsendi hayallar Qaraqalpaqstan Respublikası Joqarǵı Keńesi Prezidiumınıń qararı tiykarında Joqarǵı Keńestiń «Húrmet jarlıǵı» menen sıylıqlandı.

Qaraqalpaqstan xabar agentligi