Taxtakópir rayonında rayonlıq elektr támiynatı kárxanasınıń jańa imaratı paydalanıwǵa tapsırılıwı múnásibeti menen saltanatlı ashılıw máresimi bolıp ótti.

Ilajda rayon hákimi J.Adilov, taraw juwapkerleri hám keń jámiyetshilik wákilleri qatnastı.
Onda shıǵıp sóylewshiler «22-dekabr – Energetikler kúni» hám Jańa jıl bayramı qabatında zamanagóy xızmet imaratınıń paydalanıwǵa tapsırılǵanı menen ilaj qatnasıwshıların qızǵın qutlıqlap, bul imarattıń aymaq elektr támiynatı sistemasın bunnan bılay da jetilistiriwdegi áhmiyetin ayrıqsha atap ótti. Ózbekstan Respublikası Prezidentiniń 2020-jıl 11-noyabrdegi 4889-sanlı qararı tiykarında, bul obekttiń qurılısı ushın 5 mlrd. 171 mln sum qarjı ajıratılǵan bolıp, qurılıs procesinde energiya únemlewshi hám zamanagóy texnologiyalardan keńnen paydalanıldı hám imarat barlıq zamanagóy talaplarǵa say halda qurıldı.
Jańa imarat elektr támiynatı kárxanası xızmetkerleri ushın qolaylı miynet sharayatların jaratıw menen birge, tutınıwshılarǵa kórsetilip atırǵan xızmetlerdiń sapasın arttırıw hám elektr támiynatı sistemasınıń turaqlı jumısın támiyinlewge tiykar boladı.
Sonday-aq, máresimde Taxtakópir rayonlıq elektr támiynatı kárxanası jámáátine jańa xızmet avtomashinası da saltanatlı túrde tapsırıldı.

Adilbay Orazov,
Qaraqalpaqstan xabar agentligi sholıwshısı.