Ózbekstan Respublikası Prezidentiniń 2021-jıl 9-avgusttaǵı PQ-5216-sanlı qararı tiykarında mámleketimizde ata-ana qaramaǵınan ayırılǵan jaslardı qollap-quwatlaw, olardı erkin turmısqa tayarlaw, múnásip sharayatlar menen támiyinlew baǵdarında sistemalı jumıslar ámelge asırılmaqta.

Atap aytqanda, usı qarar tiykarında Kegeyli rayonında jáne bir iygilikli is ámelge asırılıp, Mádeniyat mákan puqaralar jıyını aymaǵındaǵı «Kegeyli gúzarı» kóshesinde jaylasqan kóp qabatlı úylerdiń birinen barlıq sharayatlarǵa iye jańa 2 bólmeli kvartiranıń gilti Baxtıgul Matjanovaǵa Jańa jıl bayramı aldınan Kegeyli rayonı hákimi A.Kamalov hám rayonlıq Insan sociallıq xızmetler orayı juwapkerleriniń qatnasıwında saltanatlı túrde tapsırıldı.
– Mine búgin húrmetli Prezidentimiz Sh. Mirziyoevtiń elimiz jaslarına kórsetip atırǵan atalarsha ǵamqorlıǵınıń arqasında, bizlerge barlıq qolaylılıqlarǵa iye jańa úy tapsırılmaqta. Bunıń ushın Jurtbasshımızǵa úlken raxmet aytaman. Búgingi quwanıshımdı til menen aytıp jetkere almayman. Qullası, bul men ushın ómirimdegi eń quwanıshlı kúnlerdiń biri boldı, desem boladı, – deydi Baxtıgul Matjanova.
Álbette, elimiz aymaqlarında islenip atırǵan bunday iygilikli isler elimizde insan qádiri, ásirese, jaslardıń táǵdiri mámleketlik siyasat dárejesinde ekenliginiń ayqın úlgisi bolıp esaplanadı.

Adilbay Orazov,
Qaraqalpaqstan xabar agentligi sholıwshısı.