Yaponiyaǵa sapar sheńberinde sanlı texnologiyalar ministri Sherzod Shermatov Yaponiyada málimleme texnologiyaları tarawında jumıs alıp barıp atırǵan hám startaplardı rawajlandırıp atırǵan ózbekstanlı watanlaslar menen ushırasıw ótkerdi.

Ushırasıw dawamında Ózbekstannıń sanlı ekonomikasın rawajlandırıw, startaplar hám MT-qánigeler ushın bar imkaniyatlar, sonday-aq, sırt eldegi ózbek diasporası menen birge islesiwdi jáne de bekkemlew máseleleri dodalandı.
Ilajda sanlı texnologiyalar ministri mámlekette startap ekosistemasınıń házirgi jaǵdayı hám rawajlanıw dinamikası, sanlı reformalardıń nátiyjeleri haqqında maǵlıwmat berdi.
Ushırasıwdıń ayrıqsha bólimi sırt elde jumıs alıp barıp atırǵan watanlaslarımız ushın IT Park Uzbekistan tárepinen jaratılǵan imkaniyatlarǵa baǵıshlandı.
Ushırasıwda Yaponiyanıń jetekshi xalıqaralıq kompaniyaları hám texnologiyalıq joybarlarında islep atırǵan jigirmadan aslam ózbekstanlı qánigeler hám startap tiykarın salıwshılar qatnastı. Olar Yaponiya bazarına kiriw, investiciyalardı tartıw hám óz-ara birge islesiwdiń ámeliy baǵdarları boyınsha pikir alıstı.
Ushırasıw juwmaǵında Yaponiyada jumıs alıp barıp atırǵan ózbekstanlı qánigeler sońǵı jıllarda Ózbekstan startap ekosistemasında baqlanıp atırǵan unamlı ózgerisler hám texnologiyalıq biznesti rawajlandırıw ushın jaratılǵan sharayatlardı joqarı bahaladı.
Tárepler eki mámleket arasındaǵı texnologiyalıq hám innovaciyalıq birge islesiwdi bunnan bılay da bekkemlew boyınsha anıq baǵdarlardı belgilep aldı.

N.Rahmanova, ÓzA