Oliy Majlis Nızamshılıq palatasınıń deputatları hám ÓzLiDeP Siyasiy Keńesiniń belsendilerinen ibarat isshi topar Nókis qalası hám Ámiwdárya rayonlarında bolıp, máhálle “jetiligi” kesiminde aymaqlarda ushırasıp atırǵan áhmiyetli mashqalalardı úyreniw, orınlarda alıp barılıp atırǵan reformalar menen jaqınnan tanısıw maqsetinde bir qatar ushırasıwlar ótkerdi.

Dáslep deputatlar Ózbekstan Máhálleler awqamı Qaraqalpaqstan Respublikası basqarmasında boldı. Ushırasıw dawamında respublikada máhálle sisteması sheńberinde ámelge asırılıp atırǵan jumıslar, máhállelerdiń jumısın bunnan bılay da jetilistiriwge qaratılǵan reformalar, sonday-aq, nızamshılıqtaǵı sońǵı jańalıqlar dodalandı. Máhálle institutınıń xalıq penen islesiwdegi ornı, máhálle “jetiligi” jumısında ushırasıp atırǵan mashqalalar hám olardı saplastırıw máselelerine ayrıqsha itibar qaratıldı.
Bunnan soń isshi topar Nókis qalasında jaylasqan “Nawqan baǵ” mákan puqaralar jıyınında boldı. Ol jerde máhállede ámelge asırılıp atırǵan reformalar, xalıqtı qıynap atırǵan mashqalalar hám olardı sheshiw boyınsha usınıs hám baslamalar tıńlandı.
Sonday-aq, ushırasıwlar dawamında sociallıq qorǵaw máseleleri de kóterildi. Atap aytqanda, ózgelerdiń kútimine mútáj bolǵan mayıplıǵı bolǵan shaxslardı kútip atırǵan shańaraq aǵzalarına baylanıslı mashqalalar dodalandı. Málim etiliwinshe, ámeldegi tártipke bola, bunday napaqa tek ǵana 18 jasqa shekemgi balalar ushın tólenip, keselligi ómirlik bolǵan hám 18 jastan asqan shaxslardıń kútimi menen shuǵıllanıp atırǵan nızamlı wákiller napaqadan ayırılıp qalmaqta. Xalıq hám máhálle belsendileri bul jaǵdaydı qayta kórip shıǵıw, eger perzenttiń keselligi erjetkennen keyin de dawam etetuǵın bolsa, napaqa tólemin saqlap qalıw boyınsha qosımshalar kirgiziw usınısın bildirdi.
Bunnan tısqarı, kóshpes múlk obektlerin mámleketlik dizimnen ótkeriwge baylanıslı máseleler de xalıqtı táshwishke salıp atırǵanı atap ótildi. Puqaralar belgilengen múddetti ótkerip jibergeni ushın iri muǵdarda járiyma tólewge májbúr bolıp atırǵanı, ayırım jaǵdaylarda bul jaǵday itibarsızlıq yamasa aqılǵa uǵras sebeplerge baylanıslı ekeni atap ótildi. Sol sebepli, eger puqara huqıqbuzarlıq anıqlanǵan kúnnen baslap bir ay ishinde óz kóshpes múlkin mámleketlik dizimnen ótkerse, onı hákimshilik juwapkershilikten azat etiwdi názerde tutatuǵın normanı nızamshılıqqa kirgiziw usınısı bildirildi. Bul bolsa xalıqtıń finanslıq júgin jeńilletiw hám dizimnen ótkeriw processlerin jedellestiriwge xızmet etetuǵını atap ótildi.

Sapar dawamında máhálle baslıǵı Zamira Aytbaevanıń baslaması menen shólkemlestirilgen “Nawqan baǵ” MPJ aymaǵındaǵı muzey jumısı menen de tanıstı. Bul “Qara úy” muzeyi 2025-jıl 30-avgust kúni aymaq pidayılarınıń járdeminde shólkemlestirilgen bolıp, ol máhálleniń tariyxı, úrp-ádetleri hám ruwxıy miyrasın qásterlep saqlawǵa xızmet etpekte. Deputatlar bul baslamanı xalıqtıń belsendiligi hám máhálledegi sociallıq-ruwxıy ortalıqtı bekkemlewge qaratılǵan áhmiyetli qádem sıpatında bahaladı.
Ushırasıwlar juwmaǵında deputatlar bildirilgen mashqala hám usınıslar tiyisli komitetler hám juwapker uyımlar menen birgelikte úyrenilip, nızamshılıq baslamaları qáliplestiriletuǵının málim etti. Deputatlıq jumısınıń tiykarǵı maqseti – xalıqtıń mashqalaların ornında úyreniw, olarǵa huqıqıy hám ámeliy sheshim tabıwdan ibarat.

Qaraqalpaqstan xabar agentligi