Qaraqalpaqstan Respublikası Ministrler Keńesinde Ózbekstan Respublikası Prezidentiniń usı jıl 19-sentyabrdegi PP-173-sanlı Pármanı tiykarında xalıq hám awıl xojalıǵın dizimge alıw ilajın ótkeriwdi shólkemlestiriw máselesine arnalǵan májilis bolıp ótti.

Májilisti Qaraqalpaqstan Respublikası Ministrler Keńesiniń Baslıǵı F.Ermanov ashtı hám basqarıp bardı.
Májiliste Ózbekstan Respublikası Suw xojalıǵı ministri Sh.Hamraev qatnasıp, dizimge alıw ilajın joqarı dárejede shólkemlestiriw boyınsha wazıypalarǵa toqtap ótti.Sonıń ishinde, xalıqtı hám awıl xojalıǵın dizimge alıw ilajın joqarı dárejede, belgilengen talap hám ólshemler tiykarında shólkemlestiriwge baylanıslı máselelerdi aymaq basshıları menen birgelikte keń túrde dodaladı. Atap ótilgenindey, bul Párman mámleketimizde mámleketlik basqarıwdı ilimiy tiykarda shólkemlestiriw, sociallıq-ekonomikalıq siyasattı anıq hám isenimli maǵlıwmatlar tiykarında belgilewge xızmet etetuǵın strategiyalıq áhmiyetke iye hújjet bolıp esaplanadı. Pármanǵa muwapıq, 2026-jıldıń 15-yanvarınan 28-fevralına shekem Ózbekstan Respublikası aymaǵında xalıq hám awıl xojalıǵın ulıwma dizimge alıw ilajı ótkeriledi. Bul maǵlıwmatlar xalıqtıń real talapların anıqlaw, sociallıq infrastrukturanı rawajlandırıw hám mámleketlik resurslardı mánzilli bólistiriwde tiykarǵı ólshem bolıp xızmet etedi. Sonıń menen birge, awıl xojalıǵı tarawında jerlerdi paydalanıw jaǵdayı, egislik maydanlardıń quramı, sharwa malları hám quslardıń sanı, diyqan hám fermer xojalıqlarınıń jumısı hám awıl xojalıǵı ónimlerin islep shıǵarıw kólemleri boyınsha haqıyqıy statistikalıq maǵlıwmatlar qáliplestiriledi.
Bunnan tısqarı, 26 million gektar awıl xojalıǵı jerlerinen paydalanıw jaǵdayın tereń úyreniw, sharwa malları hám quslardıń sanın anıqlaw arqalı awıl xojalıǵına baǵdarlanıp atırǵan jıllıq 25,6 trillion sum qarjı, sonıń ishinde, 2,2 trillion sum byudjet qarjılarınıń nátiyjeli jumsalıwın bahalaw imkaniyatı jaratıladı. Bul bolsa, tarawda xızmetler kólemin anıqlaw, ónim islep shıǵarıw nátiyjeliligin arttırıw hám azıq-awqat qáwipsizligin támiyinlew ushın bekkem analitikalıq tiykar boladı.
Prezidentimizdiń Pármanına tiykar, xalıq hám awıl xojalıǵın dizimge alıw ilajı 2026-jıl 15-yanvardan 28-fevralǵa shekem eki basqıshta ámelge asırıladı. Birinshi basqıshta – 2026-jıl 15-31-yanvar kúnleri puqaralar “census.stat.uz” portalı arqalı OneID sisteması járdeminde erkin túrde onlayn dizimnen ótedi.
Al, ekinshi basqıshta bolsa 2026-jıl 4-28-fevral kúnleri “Máhálle jetiligi” aǵzaları tárepinen úyme-úy júrip, elektron planshetler arqalı maǵlıwmatlar jıynaladı.
Májiliste Ámiwdárya rayonı hám Nókis qalası juwapkerlerine dizimge alıwǵa tayarlıq kóriw boyınsha belgilengen wazıypalardıń óz waqtında orınlanıwın támiyinlew boyınsha qatań tapsırmalar berildi hám ámelge asırılatuǵın jumıslar sın kózqarastan dodalandı. 2026-jıl 15-yanvar kúni birinshi gezekte barlıq hákimler, ministrler, basqarma, kárxana hám shólkem basshıları jáne olardıń orınbasarları jeke ózleri internet arqalı OneID platformasınan dizimnen ótip, xalıq hám awıl xojalıǵın dizimnen ótkergeni haqqındaǵı gúwalıqtı alıwı kerek ekenligi atap ótildi. Bul arqalı xalıq arasında jeke úlgi kórsetiw hám dizimge alıw ilajına isenimdi arttırıw maqset etilgen. Sonday-aq, májiliste 2025-jıl 26-dekabrge shekem xalıq hám awıl xojalıǵın dizimge alıw ilajların ámelge asırıw ushın juwapker xızmetkerler belgileniwi hám olar haqqındaǵı maǵlıwmatlar – familiyası, atı, lawazımı hám telefon nomerleri belgilengen tártipte Respublikalıq shtabqa usınılıwı kerek ekenligi belgilendi.
Bul áhmiyetli ilajdıń belgilengen talapqa say ótkeriliwi keleshekte mámleketimizdi sociallıq-ekonomikalıq rawajlandırıw boyınsha tiykarlanǵan qararlar qabıl etiwge bekkem tiykar jaratadı.

Qaraqalpaqstan xabar agentligi