“Insan” sociallıq xızmetler orayları – bul xalıqtıń sociallıq qorǵawǵa mútáj qatlamlarına bir orında kompleksli túrde xızmet kórsetiw maqsetinde shólkemlestirilgen bolıp, bul oraylar arqalı puqaralar sociallıq xızmetler, napaqa hám materiallıq járdem, reabilitaciya baǵdarlamaları, bántlik, mayıplıǵı bolǵan shaxslar ushın qollap-quwatlaw, psixologiyalıq hám huqıqıy másláhátler sıyaqlı kóplegen xızmetlerdi aladı.

Shólkemlestirilgenine kóp waqıt bolmasa da, búgingi kúnge shekem xalıqtıń sociallıq qorǵawǵa mútáj qatlamların anıqlaw hám dizimge alıw, reabilitaciya, psixologiyalıq hám zárúr sociallıq járdem kórsetiw menen birge sociallıq xızmetler ushın arzalardı qabıl etiw hám monitoringin júrgiziw boyınsha jumıs alıp barıp atırǵan oray tárepinen nátiyjeli jumıslar ámelge asırıldı.
Búgin Xojeli rayonı hákimi J. Ermashev rayonlıq “Insan” sociallıq xızmetler orayı xızmetkerleri menen ashıq sáwbet ótkerdi. Oǵan, “Insan” sociallıq xızmetler orayı rayonlıq bólimi baslıǵı Z.Xojamuratova, taraw xızmetkerleri hám ǵalaba xabar qurallarınıń wákilleri qatnastı. Ilajda shıǵıp sóylegenler húrmetli Prezidentimizdiń tarawǵa qaratıp atırǵan itibarın ayrıqsha atap ótip, jıl dawamında ámelge asırılǵan jumıslar menen birge xızmetkerlerdiń usınıs hám pikirleri tıńlandı.
Bunnan soń, 28 máhálledegi kompleks sociallıq xızmetler kórsetiwshi qánigelerdiń jumıs nátiyjeliligin arttırıwı ushın bárshesine zamanagóy kompyuter toplamları tapsırıldı, sonıń menen birge óziniń pidayı miyneti hám juwapkershiligi menen ajıralıp turǵan bir qatar taraw xızmetkerlerine minnetdarshılıq bildirildi. Bunday imkaniyatlar, xızmetkerler ushın jumıslardı elede jedel hám sapalı ámelge asırıw, xalıqtıń múrájatların óz waqtında kórip shıǵıw, sociallıq xızmetlerdiń sapasın arttırıw hám hár bir mútáj shańaraqlarǵa mánzilli xızmet kórsetiwge tiykar jaratadı.

G.Turdıshova, Qaraqalpaqstan xabar agentligi