Prezidentimizdiń baslaması menen Moynaq rayonına Tashkent wálayatı hákimliginiń qáwender etip belgileniwi, Ministrler Kabinetiniń arnawlı qararı tiykarında ámelge asırılıp atırǵan keń kólemli jumıslar xalıqtıń turmıs dárejesin jaqsılawǵa qaratılǵan reformalardıń ayqın úlgisi bolıp esaplanadı.

Usı tiykarda rayonda jámi 500 ge shamalas jaydı jańadan qurıw hám ońlaw rejelestirildi. Búgingi kúnge kelip, bul jumıslar óz nátiyjesin berip, kóplegen shańaraqlarda jańalanıw nápesi sezilmekte.
Jańa jıl bosaǵasında Moynaq rayonında jáne bir iygilikli iske qol urılıp, rayondaǵı Aral mákan puqaralar jıyınında jasawshı Q.Allanovtıń shańaraǵı hám jalǵız jasawshı T.Qarlıbaev ushın jańa turaq jaylar qurılıp paydalanıwǵa tapsırıldı.
Ilajda rayon hákimi B.Menglibekov, Tashkent wálayatı hákimligi “Birden-bir buyırtpashı xızmeti” mámleketlik kárxanası direktorınıń ekonomikalıq máseleler boyınsha orınbasarı M.Tleuov hám máhálle belsendileri qatnasıp, jańa turaq jay iyelerin qutlı qonıs menen qutlıqladı.
Úy iyeleri bolsa, jańa jıldı jańa úyde, jańa ármanlar menen kútip alıp atırǵanınan quwanıshlı. Olar mámleketimiz basshısına, alıp barılıp atırǵan insanıylıq siyasatqa shın júrekten minnetdarshılıq bildirip, jańa jıl elimizge tınıshlıq, abadanlıq hám bereket alıp keliwin tiledi.

Qaraqalpaqstan xabar agentligi