Tómengi palatanıń májilisinde joqarı bilimlendiriw, ilim hám innovaciyalar ministri Q.Sharipovtıń “Korrupciyaǵa qarsı gúresiw boyınsha mámleketlik baǵdarlamalardıń orınlanıwı hám tarawda korrupciya faktorların saplastırıw baǵdarında ámelge asırılıp atırǵan jumıslar haqqında”ǵı málimlemesi tıńlandı.

Ministr tárepinen atap ótilgenindey, joqarı bilimlendiriw sistemasında korrupciyaǵa qarsı gúresiw, ashıq-aydınlıqtı támiyinlew baǵdarında keń kólemli jumıslar ámelge asırılmaqta. “Korrupciyasız taraw” joybarı tiykarında komplaens qadaǵalaw sisteması engizilip, ashıq-aydınlıqtı támiyinlew, insan faktorın azaytıw maqsetinde “HEMIS”, diplom.edu.uz, vacancy.edu.uz sıyaqlı málimleme sistemaları iske qosılǵan. Joqarı bilimlendiriw mákemelerinde “Registrator ofis”ler shólkemlestirilip, bul arqalı 30 dan aslam mámleketlik xızmetler “Bir ayna” principi tiykarında elektron túrde kórsetiliwi jolǵa qoyılǵan.
Ministrlik sistemasında “Situatsion markaz” arqalı aralıqtan audit hám aymaqlarda profilaktikalıq qadaǵalaw ilajları ámelge asırılıp, nátiyjede 113,6 mlrd. sumlıq finanslıq qátelikler hám nátiyjesiz qárejetlerdiń aldı alınǵan, 4,4 mlrd. sumlıq huqıqbuzarlıqqa baylanıslı materiallar huqıq qorǵaw uyımlarına usınılǵan.
Ministrdiń sózlerine bola, pedagog hám studentlerdiń islegen korrupciyalıq jınayatları tallanǵan. Bas prokuratura menen birgelikte anıq ilajlardı ámelge asırıw boyınsha 2 jılǵa mólsherlengen “Jol kartası” islep shıǵıldı.
Mámleketlik emes joqarı bilimlendiriw mákemelerin licenziyalaw processlerindegi talaplar 9 dan 5 ke túsirildi. Nátiyjede mámleketlik emes joqarı bilimlendiriw mákemeleriniń sanı 74 ke, olardaǵı studentlerdiń sanı bolsa 716 mıńǵa jetti.
Sanlastırıw processleri tarawǵa keńnen engizilmekte. Nátiyjede finanslıq esap-sanaqlarda korrupciyalıq faktorlardıń aldı alınbaqta, finanslıq qáwipsizlik támiyinlenbekte. Finanslıq processlerdiń jedelligi 80 procentke arttırıldı.
Dodalawlarda erisilgen nátiyjeler menen bir qatarda tarawda ele sheshiliwi kerek bolǵan ayırım máseleler hám belgili bir kemshilikler saqlanıp qalıp atırǵanı atap ótildi. Bir qatar sorawlar ortaǵa taslanıp, tiyisli juwaplar alındı. Atap aytqanda, studentlerdiń jataqxanalarǵa bolǵan talabı boyınsha deputatlardıń sorawına juwap bergende ministr studentler turaq jaylarında 2030-jılǵa shekem 150 mıń orın jaratılıwı belgilengenin aytıp ótti. Házirgi waqıtta 50 procentten aslam jaslardıń jataqxanaǵa bolǵan talabı qanaatlandırılǵan. Ministr jáne 3 jıldan keyin studentler turaq jayına bolǵan talap júz procent qanaatlandırılatuǵının málim etti.
Ministr tıńlawı dawamında joqarı bilimlendiriw sistemasında ashıq-aydınlıqtı támiyinlew hám korrupciyaǵa mawasasız ortalıqtı qáliplestiriw, joqarı bilimlendiriw processlerin basqarıw “HEMIS” platformasın keń kólemde hám nátiyjeli engiziw zárúrligi atap ótildi. Bir qatar usınıslar berildi.
Májiliste joqarı bilimlendiriw, ilim hám innovaciyalar ministriniń málimlemesi maǵlıwmat ushın qabıl etildi.

Muhtarama Komilova, ÓzA