Bıyıl elimizdiń sırtqı siyasatında diplomatiyalıq qatnasıqlar geografiyası sezilerli dárejede keńeygen jıl sıpatında kózge taslanbaqta.

Rásmiy maǵlıwmatlarǵa bola, jıl dawamında mámleketimiz Afrika, Okeaniya hám de Karib basseynine tiyisli 8 mámleket penen diplomatiyalıq qatnasıqlar ornatıldı.
Atap aytqanda, Afrika materiginde jaylasqan Somali Federativlik Respublikası (22-fevral), Mozambik Respublikası (21-iyun), Eritreya (10-iyul), Kot-d‘Ivuar Respublikası (29-sentyabr) hám Keniya (20-sentyabr) menen diplomatiyalıq qatnasıqlar jolǵa qoyıldı. Bul qádemler elimizdiń Afrika mámleketleri menen siyasiy sóylesiwdi jedellestiriw, sawda-ekonomikalıq hám gumanitarlıq birge islesiwdi basqıshpa-basqısh rawajlandırıwǵa qaratılǵan sırtqı siyasat strategiyası izbe-iz ámelge asırılıp atırǵanın tastıyıqlaydı.
Okeaniya regionında jaylasqan Nauru Respublikası (20-mart) hám Palau (26-sentyabr) menen diplomatiyalıq baylanıslardıń ornatılıwı da elimiz sırtqı siyasatınıń geografiyalıq sheńberi keńeyip atırǵanınan derek beredi. Geografiyalıq jaqtan uzaq bolǵan bul mámleketler menen qatnasıqlar xalıqaralıq shólkemler, ásirese, BMSh sheńberinde óz-ara qollap-quwatlaw hám birgeliktegi baslamalardı alǵa qoyıw ushın ayrıqsha áhmiyetke iye.
Sonday-aq, Sent-Lyusiya (10-sentyabr) menen diplomatiyalıq qatnasıqlardıń ornatılıwı Ózbekstannıń Karib basseyni hám Amerika regionlarına shıǵıwın jáne de bekkemledi. Bunday qatnasıqlar xalıqaralıq maydanda siyasiy sóylesiwdi keńeytiw hám kóp tárepleme birge islesiw imkaniyatların arttırıwǵa xızmet etedi.
Ekspertlerdiń pikirinshe, bul mámleketler menen diplomatiyalıq qatnasıqlardıń ornatılıwı sırtqı ekonomikalıq baylanıslardı diversifikaciyalaw, jańa bazarlarǵa shıǵıw hám xalıqaralıq maydanda Jańa Ózbekstannıń abırayın arttırıwǵa tiykar jaratadı.

Dilshod HAKIMOV,
ÓzAnıń xabarshısı