Qaraózek rayonında saltanatlı toylar hám basqa da shańaraqlıq máresimlerdi ıqshamlastırıwǵa, olardı milliy qádiriyatlarımızǵa say, artıqsha dábdebesiz hám ısırapgershilikke jol qoymastan ótkeriwge qaratılǵan úgit-násiyat ilajı shólkemlestirildi.

Onda rayon hákiminiń orınbasarı I.Qosıbaev, «Nuraniy» qorı rayonlıq bólimi baslıǵı M.Gúlimbetov hám basqalar shıǵıp sóylep, toy-merekeler, hár qıylı shańaraqlıq máresimlerde artıqsha ısırapgershilikke jol qoymaw, máresimlerdi tártipli hám ıqsham túrde ótkeriw máseleleri boyınsha búgingi kúni isleniwi tiyis máseleler haqqında keń túrde aytıp ótti.
Ilajda máhálle jetiligi wákilleri, kóshe biyleri, hayal-qızlar belsendileri, nuranıylar hám jámiyetshilik wákilleri belsene qatnasıp, ortaǵa qoyılǵan másele boyınsha ózleriniń pikir-usınısların bildirdi.
Ótkerilgen ushırasıwda ilaj qatnasıwshılarına sońǵı jılları elimizde dábdebeli toy-máresimler sebepli shańaraqlarda júz berip atırǵan kewilsizlikler hám olardıń ayanıshlı aqıbetleri haqqında tiyisli taraw qánigeleri tárepinen keń túrde túsinik júrgizildi.

Qaraqalpaqstan xabar agentligi