Ájiniyaz atındaǵı Nókis mámleketlik pedagogikalıq institutınıń Anıq pánler fakultetinde jaslar arasında doslıq, óz-ara húrmet hám mádeniy kóp túrlilikti ele de bekkemlew, studentler arasında awızbirshilik hám keńpeyillikti úgit-násiyatlaw maqsetinde «Ózbekstan – ulıwma úyimiz!» súreni astında «Biz – bir shańaraq perzentlerimiz» atamasında milletler aralıq tatıwlıq hám doslıq festivalı shólkemlestirildi.

Ilajǵa Ózbekstan Respublikasına miyneti sińgen jaslar ustazı B.Sultanov, Qaraqalpaqstan Respublikası Ministrler Keńesiniń Din isleri boyınsha bas qánigesi H.Ibragimova, «Nuranıy» qorı Nókis qalalıq bóliminiń baslıǵı K.Qálenderov, Respublikalıq Ruwxıylıq hám aǵartıwshılıq orayı Nókis qalalıq bóliminiń baslıǵı Q.Nuratdinov, belgili ónermentler, professor-oqıtıwshılar, tyutorlar hám student-jaslar qatnastı.
Festivalda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov hám basqalar shıǵıp sóylep, házirgi globallasıw dáwirinde milletler aralıq tatıwlıq, óz-ara awızbirshilik, doslıq qatnasıqları jámiyetimiz hám mámleketimizdiń hár tárepleme rawajlanıwında úlken áhmiyetke iye baǵdarlardıń biri ekenligi atap ótildi.
Ilaj sheńberinde elimizde milletler aralıq doslıq hám awızbirshilik ideyaların keń en jaydırıwda ayrıqsha belsendilik kórsetip kiyatırǵan instituttıń birinshi prorektorı Quvondiq Qodirov hám Anıq pánler fakulteti dekanınıń orınbasarı Xalmurat Esemuratovlar húrmet jarlıǵı menen sıylıqlandı.
«Tumaris» xalıq ansambli hám talantlı student-jaslardıń atqarıwındaǵı koncert baǵdarlaması bayram qatnasıwshılarına kóterińki keypiyat inám etti.

Qaraqalpaqstan xabar agentligi