Puqaralıq isleri boyınsha Nókis rayonlar aralıq sudınıń 2025-jıl 8-avgusttaǵı orınlaw hújjetine tiykarlanıp, nızamsız túrde jumıstan bosatılǵan, dawager D.G.nı Respublikalıq suw sportı túrleri boyınsha sport mektebiniń psixologı lawazımına tiklew belgilengen.

Soǵan qaramastan, juwapker Respublikalıq suw sportı túrlerine qánigelestirilgen sport mektebi mámleketlik mákemesi tárepinen usı sud qararınıń orınlanıwı támiyinlenbegen.
Onda dawager sud qararınıń orınlanıwın támiyinlep beriwin sorap, Májbúriy orınlaw byurosı Nókis qalalıq bólimine múrájat etiwge májbúr bolǵan.
Byuronıń Nókis qalalıq bólimi tárepinen dárhal orınlaw háreketlerine kirisildi, juwapker shólkem basshısına sud qararınıń orınlanıwın támiyinlemese, nızamda belgilengen juwapkershilikke tiykar bolatuǵını haqqında eskertiw berilgen.
Sonıń nátiyjesinde, dawager D.G. Respublikalıq suw sportı túrlerine qánigelestirilgen sport mektebi direktorınıń buyrıǵına tiykarlanıp óziniń aldınǵı jumıs ornına qayta jumısqa tiklengen.

Qaraqalpaqstan xabar agentligi.