Shomanay rayonı hákimliginiń Málimleme xızmeti tárepinen 2025-jıl dawamında rayon aymaǵında ruwxıy-aǵartıwshılıq baǵdarında ámelge asırılǵan jumıslarǵa baǵıshlanǵan ashıq sáwbetlesiw shólkemlestirildi.

Oǵan, rayon hákiminiń orınbasarı A.Bekmuratov, Ruwxıylıq hám aǵartıwshılıq orayı Shomanay rayonlıq bóliminiń baslıǵı I.Allaniyazov, ǵalaba xabar qurallarınıń wákilleri, deputatlar, tarawda birge islesiwshi mákeme, kárxana hám shólkemlerden tiyisli qánigeler qatnastı.
Ashıq sáwbetlesiw dawamında 2025-jıl dawamında rayonda ruwxıy-aǵartıwshılıq baǵdarında ótkerilgen ilajlar, úgit-násiyatlaw jumısları, milliy qádiriyatlar, watansúyiwshilik, kitapqumarlıq mádeniyatın arttırıw boyınsha jaslar arasında ámelge asırılǵan joybarlar haqqında hár tárepleme maǵlıwmatlar berildi. Sonday-aq, ámelge asırılǵan jumıslardıń nátiyjeleri, mashqalalar dodalanıp, pikir-usınıslar bildirildi.
Atap ótilgenindey, rayondaǵı bilimlendiriw mákemeleri menen máhállelerde ruwxıy tárbiyanıń úzliksizligin támiyinlew, xalıqtıń internet hám ǵalaba xabar qurallarınan paydalanıw mádeniyatın, mádeniyat, ádebiyat hám kórkem ónerge bolǵan qızıǵıwshılıǵın arttırıw boyınsha bir qatar ilajlar ámelge asırıldı. Ideologiyalıq processlerdi turaqlı túrde úyreniw, terrorizm, ekstremizm, jınayatshılıq hám basqa da qáwiplerge qarsı gúresiw boyınsha birge islesiwshi shólkemler menen birgelikte ushırasıwlar, sáwbetlesiwler, úgit-násiyatlaw ilajları shólkemlestirildi.
– Bunnan tısqarı, elimizde ámelge asırılıp atırǵan keń kólemli reformalardıń barısı, sociallıq-ekonomikalıq rawajlandırıw boyınsha qabıl etilip atırǵan párman hám qararlardıń mazmunı hám áhmiyeti, milletler aralıq tatıwlıqtı bekkemlew boyınsha oqıw orınlarında, máhálelerde, barlıq mákeme hám kárxanalarda úgit-násiyat ilajları shólkemlestirildi. Rayondaǵı 26 mákeme hám kárxanada eki tárepleme «Jol karta» islenip, mánáwiyat boyınsha juwapkerler bekitildi, – deydi Ruwxıylıq hám aǵartıwshılıq orayı Shomanay rayonlıq bóliminiń baslıǵı I.Allaniyazov.
Rayondaǵı mákeme, kárxana hám shólkemlerde sociallıq-ruwxıy ortalıqtıń turaqlılıǵın támiyinlew, xızmetkerlerdiń ruwxıy dúnyasın bayıtıw, elimizdegi siyasiy-sociallıq, ekonomikalıq tarawlarda ámelge asırılıp atırǵan reformalar, júz berip atırǵan unamlı ózgerisler, jaratılıp atırǵan imkaniyatlar haqqında maǵlıwmat berip barıw maqsetinde barlıq mákemelerde hár hápteniń juma kúni «Siyasiy ruwxıylıq saatları» turaqlı túrde ótkerilip kelinbekte.
Ilajda juwapkerler tárepinen bildirilgen pikir-usınıslar dodalanıp, aldaǵı waqıtları ruwxıy-aǵartıwshılıq jumıslardı bunnan bılay da sistemalı hám nátiyjeli shólkemlestiriw boyınsha áhmiyetli wazıypalar belgilep alındı.

Qaraqalpaqstan xabar agentligi