Sońǵı jılları elimizde xalqımızdıń abadanlıǵın támiyinlew, turmıslıq mashqalalarına sheshim tabıw baǵdarında keń kólemli jumıslar ámelge asırılmaqta.

Bul baǵdarda Kegeyli rayonında da infrastruktura menen baylanıslı mashqalalardı saplastırıw boyınsha bir qatar ilajlar alıp barılıp, xalıqtı qıynap kelgen máselelerge sheshim tabıw ilajları kórilmekte.
Kegeyli rayonındaǵı Xalqabad posyolkasında «Xalqabad diyqan bazarı»nıń ashılıw máresimi ótkerildi.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı jaqınlap qalǵan «Jańa jıl» bayramı, sonday-aq, «Xalqabad diyqan bazarı»nıń paydalanıwǵa tapsırılıwı múnásibeti menen qutlıqladı.
Atap ótilgenindey, bazar aymaǵında 5,2 mlrd. sum qarjı esabınan rekonstrukciyalaw jumısları alıp barıldı. Satıwshılar hám qarıydarlar ushın qolaylı sharayatlar jaratıw maqsetinde bastırmalı sawda qatarları, jańa dúkanlar qurılıp, diyqan bazarı zamanagóy kóriniske keltirildi. Bazar aymaǵı keńeytilip, kanalizaciya tarmaqları tartıldı hám átirapları abadanlastırıldı. Zamanagóy kameralar ornatılıp, sanlastırıw jumısları alıp barıldı.
Ashılıw saltanatı dawamında miymanlar bazar aymaǵında jaratılǵan sharayatlar menen jaqınnan tanıstı.

Qaraqalpaqstan xabar agentligi