Prezidentimizdiń baslaması menen hár jılı dekabr ayında elimizde Awıl xojalıǵı xızmetkerleri kúni keń túrde belgilenip atır. Hár jıldaǵıday bıyıl da Nókis qalasındaǵı Atshabar maydanında Awıl xojalıǵı xızmetkerleri kúnine baǵıshlanıp, saltanatlı bayram ilajı hám tamashaları bolıp ótti.

Bayramnıń ashılıw saltanatında Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı Awıl xojalıǵı xızmetkerleri kúni bayramı menen qutlıqladı.
Respublikamız basshısı óz sózinde búgingi kúni elimizde awıl xojalıǵın modernizaciyalaw, tarawda jańa texnika hám innovaciyalıq texnologiyalardı engiziw, jer-suw resurslarınan nátiyjeli paydalanıwdı en jaydırıw, xalıqtı sapalı azıq-awqat ónimleri menen támiyinlew, fermer hám klasterlerdi qollap-quwatlaw boyınsha alıp barılıp atırǵan keń kólemli jumıslarǵa toqtap ótti. Sonday-aq, Ózbekstan Respublikası Prezidenti tárepinen tek ǵana Qaraqalpaqstan ushın qabıl etilgen qarar hám pármanlar tiykarında xalqımızdıń abadan turmısın támiyinlew boyınsha oǵada kólemli jumıslar ámelge asırılıp atırǵanlıǵına ayrıqsha toqtaldı.
Ótkerigen bayram saltanatında agrar tarawda jemisli jumıs islep atırǵan bir qatar miynet aldınǵıları xoshametlendi.
Atap aytqanda, «Eń aldıńǵı fermer xojalıǵı» nominaciyasına «Úrkinbay» fermer xojalıǵınıń baslıǵı Aytbay Nugmanov ılayıq dep tabıldı hám Prezidentimiz sawǵası Traktor tapsırıldı. «Eń jaqsı baǵman» nominaciyası boyınsha «Ozod intensiv boǵ» fermer xojalıǵınıń baslıǵı Azat Masharipov kishi traktor, «Eń jaqsı sharwa fermer» nominaciyası boyınsha «Dadabay Bayramkilich» fermer xojalıǵınıń baslıǵı Azamat Dadebaev motoroller menen sıylıqlandı.
Bunnan tısqarı, «Eń jaqsı tawıq baǵıwshı», «Eń jaqsı balıqshı» nominaciyası jeńimpazları granulyator, «Eń jaqsı pal hárre baǵıwshılar», «Eń jaqsı pillekesh», «Eń jaqsı mexanizator», «Eń jaqsı eksportyor», «Eń jaqsı paxtakesh», «Eń jaqsı ǵállekesh», «Eń jaqsı kombaynshı»larǵa xolodilnik, «Eń jaqsı qarakólshilik xojalıǵı», «Eń jaqsı irrigator», «Eń jaqsı meliorator», «Eń jaqsı veterinar», «Eń jaqsı ósimliklerdi qorǵawshı laborant»lar hár biri skuter, «Eń jaqsı ıssıxanashı», «Eń jaqsı palız jetistiriwshi», «Eń jaqsı ovoщ jetistiriwshi», «Eń jaqsı kartoshkashı», «Eń jaqsı qıytaq jer iyesi» nominaciyası jeńimpazlarınıń hár birine motokultivator, «Eń jaqsı awıl xojalıǵı ilimpazı»na televizor, «Eń jaqsı awıl xojalıǵı innovatorı»na noutbuk tapsırıldı.
Bunnan soń bayram tamashaları xalıq oyınları hám milliy sport oyınları menen dawam etti.
Eń dáslep bayram tamashaları qala hám rayonlardan kelgen bilegi kúshli jigitlerden ibarat komandalardıń arqan tartısıw bellesiwleri baslandı.
Qızıqlı ótken jarısta Shımbay rayonı komandası birinshi, aqmańǵıtlılar ekinshi, Moynaq rayonınıń komandası úshinshi orınlardı iyeledi.
Bunnan soń qoshqar dúgistiriw jarısına náwbet berilip, xalqımızdıń bul milliy oyını da tamashagóylerde úlken qızıǵıwshılıq oyattı. Onda hár bir jeńip shıqqan qoshqarlardıń iyelerine bahalı sawǵalar tapsırıldı. Atap aytqanda, birinshi orındı iyelegen qoshqar iyesine gibrid motoroller,ekinshi hám úshinshi orınǵa elektromotroller, skuter hám basqa da bahalı sawǵalar menen tapsırıldı.
Sońınan bayram qatnasıwshılarınıń itibarı qurǵa qaratılıp, onda jarıstıń tańlap alıw basqıshınan tabıslı ótken kúshli palwanlar jeńimpazlıq ushın óz-ara bellesti. Atap aytatuǵın bolsaq, eń awır salmaq kategoriyasında bas bayraq ushın Nókis rayonınan kelgen palwan Zaxiriddiyin Zaytov hám Nókis qalası palwanı Jaloliddin Babajanovlar gúresip, onda azǵana ústemlik penen Zahiriddiyin Zaytov jeńiske eristi.
Qaraqalpaqstan Respublikası Joqarǵı Keńesiniń Baslıǵı Amanbay Orınbaev palwanǵa bas bayraq – Prezidentimizdiń sawǵası 40 mln. sum sıylıqtı tapsırdı.
Ekinshi orın iyesi J.Babajanov 30 mln, úshinshi orın iyesi S.Matkarimov 20 mln sum hám onıń qarsılası R.Kudanov muzlatqısh penen sıylıqlandı.
Al, +83 kg salmaq kategoriyasında B. Orınbasarov hám D.Tórebaevlar xolodilnik penen sıylıqlandı. Bunnan tısqarı, 66, 73, 81 kg salmaq kategoriyasındaǵı palwanlar da múnásip xoshametlendi.
Bunnan soń bir, úsh, bes, bes aylaw (jorǵa), jeti, on aylawǵa atlar jiberildi. Onda respublikamızdıń barlıq rayonlarınan kelgen sheber shabandozlar shólkemlestiriwshiler tárepinen qoyılǵan bahalı sawǵalar ushın báygige tústi.
Sonıń ishinde, on aylawǵa at shaptırıw jarısı hámmede qızıǵıwshılıq oyatıp, olar shabandozlardıń hár bir aylanımın dıqqat penen gúzetip bardı. Oǵada qızıqlı ótken jarıs juwmaǵında Moynaq rayonınan kelgen seyis Sarsenǵaliy Talasovtıń atı báygini birinshi bolıp kesip ótti hám bas bayraq esaplanǵan Prezidentimizdiń sawǵası «Onix» avtomashinasın jeńip aldı.
Al, ekinshi orındı iyelegen aqmańǵıtlı Salamat shabandozǵa 50 mln, úshinshi orın iyesi qanlıkólli Abdiǵaniy palwanǵa 30 mln. sum aqshalay sıylıq hám qımbat bahalı sawǵalar berildi.
Sonday-aq, bayram tamashasında ótkerilgen 7 aylaw boyınsha 1-orınǵa 30 mln. sum, 2-orınǵa 20 mln. sum, 3-orınǵa 15 mln. sum, 5 aylaw boyınsha 1-orınǵa 20 mln. sum, 2-orınǵa 15 mln. sum, 3-orınǵa 10 mln. sum, 5 aylawǵa jorǵa jarısında 1-orınǵa 20 mln. sum, 15 mln. sum, 3-orınǵa 10 mln. sum, 3 aylawǵa 1-orınǵa 10 mln. sum, 2-orınǵa 5 mln. sum, 3-orınǵa shań jutqısh, 1 aylaw tay shabısqa 1-orınǵa muzlatqısh, 2-orınǵa televizor, 3-orınǵa shań jutqısh tapsırıldı.
Sonıń menen birge, bayramda qız quwıw, teńge alıw, ılaq-kókpar jarısları da ótkerilip, olardıń jeńimpazlarınıń hár biri bahalı sawǵalar menen xoshametlendi.
Kewilli hám oǵada qızıqlı ótken bayramda xalqımızǵa diyqanlarımız tárepinen jetistirilgen awıl xojalıǵı ónimleriniń yarmarkası, sheber aspazlarımız tayarlaǵan túrli taǵamlar usınıldı.
Kórkem óner sheberleri atqarıwındaǵı koncert baǵdarlaması bolsa, bayram qatnasıwshılarına ayrıqsha zawıq baǵıshladı. Awıl xojalıǵı xızmetkerleri kúnine baǵıshlanıp ótkerilgen bayram tamashaları xalıq seyili menen dawam etti.
Qullası bıyılǵı ótkerilgen bayram ilajı xalqımız ayta júrgendey ájayıp bayram boldı.
Saltanatlı bayram ilajına Ózbekstan Respublikası Suw xojalıǵı ministri Sh.Hamraev, Qaraqalpaqstan Respublikası Ministrler Keńesiniń Baslıǵı F.Ermanov qatnastı.

Qaraqalpaqstan xabar agentligi