Senattıń jalpı májilisinde basqarıw servis kompaniyaları hám turaq jay múlk iyeleri shirketleri tárepinen kórsetilip atırǵan xızmetlerdiń jaǵdayı dodalandı.

Xalıqqa turaq jay kommunallıq xızmetler kórsetiwdi pútkilley jaqsılaw hám kommunallıq xızmetlerdiń basqarıw sistemasın jetilistiriw arqalı onıń nátiyjeliligin arttırıw baǵdarında keń kólemli jumıslar ámelge asırılıp atırǵanı atap ótildi. Atap aytqanda, ótken dáwir dawamında tarawdı tártipke salıwǵa baylanıslı 50 ge shamalas normativlik-huqıqıy hújjet qabıl etilgen.
Búgingi kúnde respublikamızda 44 mıń 280 kóp kvartiralı jay bolıp, olardaǵı 1,5 millionnan aslam kvartiraǵa 971 basqarıw servis kompaniyası hám 241 turaq jay múlk iyeleri shirketi xızmet kórsetpekte.
Jalpı májiliste senatorlar turaq jay kommunallıq xızmetler kórsetiwdi jaqsılaw hám kommunallıq xızmetlerdiń basqarıw sistemasın jetilistiriw boyınsha ámelge asırılıp atırǵan jumıslar menen bir qatarda, xalıqtıń durıs narazılıqlarına sebep bolıp atırǵan hám óz sheshimin kútip atırǵan ayırım máselelerge de itibar qarattı.
Sonıń ishinde, ayırım basqarıw kompaniyaları tárepinen májbúriy tólemlerdi belgilewde “Kóp kvartiralı turaq jaylardı basqarıw haqqında”ǵı nızamǵa ámel etpewi hám kórsetilip atırǵan xızmetler haqqında turaq jay múlk iyelerine óz waqtında esap bermewi múlk iyeleriniń durıs narazılıqlarına sebep bolmaqta.
Bunnan tısqarı, kóp kvartiralı turaq jaylardıń múlk iyeleriniń kelisimisiz jaydıń podvalınıń ijaraǵa beriliwi, sonday-aq, ijaraǵa berilgen ulıwmalıq múlk ijarası haqqındaǵı maǵlıwmatlar “Meniń úyim” billing sistemasına biriktirilmegeni hám basqarıw kompaniyaları tárepinen abadanlastırıw jumısları alıp barılmay atırǵanı ayrıqsha atap ótildi.
Dodalaw juwmaǵında usınday máselelerge anıqlıq kirgiziw maqsetinde Senattıń Ministrler Kabinetine parlamentlik soraw jiberiw haqqındaǵı qararı qabıl etildi.

N.Abduraimova,
ÓzAnıń xabarshısı