Sońǵı jılları elimizde milletler aralıq tatıwlıqtı támiyinlew hám xalıqlar doslıǵın bekkemlew baǵdarında kóplegen unamlı ilajlar ámelge asırılmaqta. Ásirese, xalqımızdıń milliy ózgesheligi, kórkem óneri hám mádeniyatın tanıtıw boyınsha maqtawǵa ılayıqlı jumıslar alıp barılmaqta.

Usınday mádeniy ilajlardıń biri Gúlistan qalasında ótkerilip, onda «Ayqulash» Qaraqalpaq mámleketlik milliy folklor ansambiliniń dóretiwshilik jámááti Sırdárya wálayatlıq Muzıkalı drama teatrında ózleriniń koncert baǵdarlamasın xalqımızǵa usındı.
Ásirese, Ózbekstan hám Qaraqalpaqstan xalıq artisti Gúlxatiysha Ayımbetova, Qaraqalpaqstanǵa xızmet kórsetken artist Baxtiyar Esemuratov, jas qosıqshılardan Maqset Xojasov, Ilyas Baltabaevtıń atqarǵan yoshlı qosıqları menen «Ayqulash» ansambli aǵzalarınıń kórsetken ayaq-oyınları tamashagóylerde ayrıqsha tásir qaldırdı.
Álbette, mádeniyat tarawındaǵı óz-ara bunday qatnasıqlar xalıqlarımız arasındaǵı doslıqtı ele de bekkemlewge salmaqlı úles boldı dep ayta alamız.

Qaraqalpaqstan xabar agentligi