Hámiledarlıq hám tuwıw napaqaların tártipke salıw xalıqtı sociallıq qorǵaw sistemasınıń áhmiyetli baǵdarlarınan biri bolıp esaplanadı. Bul napaqalar analıqtı qollap-quwatlaw, hayal-qızlar hám balalardıń salamatlıǵın qorǵaw, sonday-aq, shańaraqlardıń sociallıq-ekonomikalıq turaqlılıǵın támiyinlewge xızmet etedi.

Húkimettiń usı jıl 17-dekabrdegi tiyisli qararı menen “Mámleketlik sociallıq qamsızlandırıw sheńberinde waqtınsha miynetke jaramsızlıq jáne hámiledarlıq hám tuwıw napaqaların tayınlaw jáne tólew tártibi haqqında”ǵı reje tastıyıqlandı.
Rejege bola, qamsızlandırılǵan shaxslarǵa qamsızlandırıw hádiyseleri júz bergende 2026-jıl 1-yanvardan hámiledarlıq hám tuwıw napaqası, 2026-jıl 1-iyulden waqtınsha miynetke jaramsızlıq napaqası sıyaqlı tólemler tólenedi.
Qamsızlandırılǵan shaxslarǵa qamsızlandırıw hádiysesi júz bergende mámleketlik sociallıq qamsızlandırıw boyınsha tólemlerdi alıw huqıqı qamsızlandırılǵan shaxslar jumıs beriwshi menen miynet qatnasıqlarında bolǵan dáwirde, yuridikalıq yamasa fizikalıq tárepler menen dúzilgen puqaralıq-huqıqıy xarakterge iye shártnamalar tiykarında xızmet kórsetip atırǵan dáwirde hám nızamshılıqta belgilengen tártipte basqa da rásmiy jumıs penen bánt bolǵan dáwirde, sonday-aq, hámiledarlıq hám tuwıw napaqasın alıw ushın keminde 10 ay, waqtınsha miynetke jaramsızlıq napaqasın alıw ushın keminde 6 ay qamsızlandırıw stajı bar bolǵanda tayınlanadı.
Waqıtsha miynetke jaramsızlıq napaqası boyınsha tólemler miynetke jaramsızlıq qaǵazında kórsetilgen barlıq dáwir ushın, biraq 1 kalendar jıl dawamında 182 kalendar kúnnen aspaǵan bólegi ushın ámelge asırıladı.
Hámiledarlıq hám tuwıw boyınsha napaqa muǵdarın esaplawda qamsızlandırılǵan shaxstıń qamsızlandırılǵan stajına sáykes túrde ortasha aylıq miynet haqısına tómendegi staj koefficienti qollanıladı:
10 aydan 24 ayǵa shekem (24 ay da kiredi) qamsızlandırıw stajına iye bolǵanda – 75 procent;
25 aydan 60 ayǵa shekem (60 ay da kiredi) qamsızlandırıw stajına iye bolǵanda – 85 procent;
61 hám onnan artıq ay qamsızlandırıw stajına iye bolǵanda – 100 procent.
Qamsızlandırılǵan shaxslarǵa tayınlanǵan mámleketlik sociallıq qamsızlandırıw boyınsha tólemlerdi tólew finanslıq agent tárepinen ámelge asırıladı.

Muhayyo Toshqoraeva,
ÓzA