Qashqadárya wálayatınıń orayı Qarshı qalasında jas óspirimler arasında Ózbekstan chempionatı bolıp ótti.
CHempionatqa elimizdiń barlıq aymaqlarınan jas palwanlar qatnasıp, 10 salmaq kategoriyası boyınsha jarıs jeńimpazlıǵı ushın óz-ara bellesti.

Keskin ótken bellesiwlerde respublikamız wákillerinen 73 kg salmaqta Erkinbay Ázerbaev finalǵa shekem jetip kelip, chempionlıq ushın bolǵan gúreste Tashkent qalası palwanı Vohidjon Shermamatovqa jeńilip qaldı hám jarıstıń gúmis medalı menen sıylıqlandı.
Al, qızlar arasında ótkerilgen bellesiwlerde Sapargúl Dáribaeva 30 kg salmaqta úshinshi orındı jeńip aldı.
Jas palwanlarımızdı jarısqa tájiriybeli trenerlerden Nizamatdin Xojabaev hám Zulfiya Japaqovalar tayarladı.

Adilbay Orazov,
Qaraqalpaqstan xabar agentligi sholıwshısı.