Jergilikli ónimlerdi xalıqaralıq standartlarǵa muwapıq islep shıǵarıwdı qollap-quwatlaw, isbilermenler hám islep shıǵarıwshılardıń bilim hám tájiriybesin arttırıw maqsetinde ÓzLiDeP Qaraqalpaqstan Respublikası Keńesi tárepinen Nókis qalasında jumıs alıp barıp, óziniń sapalı sút ónimleri menen tutınıwshılardıń isenimine erisip kiyatırǵan «Panamilk» kompaniyasına biznes-sapar shólkemlestirildi.

Sapar dawamında isbilermenler hám islep shıǵarıwshılar sút ónimlerin qayta islew, zamanagóy texnologiyalar tiykarında qadaqlaw processleri menen jaqınnan tanıstı. Ol jerde kompaniyanıń jumısı, sapa qadaǵalawı hám óndiriske xalıqaralıq standartlardı engiziw boyınsha «Panamilk» kompaniyasınıń basshısı tárepinen hár tárepleme maǵlıwmatlar berildi.
Bunnan soń “Jańa Ózbekstan – básekige shıdamlı ónimler eli” joybarı sheńberinde «Panamilk» kompaniyasınıń basshısı, jas isbilermen Timur Panaev tarawǵa qızıǵıwshılar ushın seminar-trening ótkerip, óziniń bilimi hám toplaǵan ámeliy tájiriybeleri menen ortaqlastı.
Seminar dawamında T.Panaev jergilikli ónimlerdi dúnya bazarına alıp shıǵıw, eksportlıq potencialın arttırıw hám «Made in Uzbekistan» brendin xalıqaralıq kólemde úgit-násiyatlaw baǵdarındaǵı maqsetlerine ayrıqsha toqtap ótti.
– Elimizde islep shıǵarılǵan ónimlerdi dúnya bazarına alıp shıǵıw hám eksport kólemin arttırıw tiykarǵı maqsetim bolıp esaplanadı. «Made in Uzbekistan» brendiniń xalıqaralıq abırayın arttırıw ushın barlıq imkaniyatlardı iske qosaman. Xalqımız hám sırt elli tutınıwshılar ushın da sapalı hám mazalı sút ónimlerin islep shıǵarıp, hár bir shańaraqta salamat ortalıq jaratıwǵa úles qospaqshıman. Bul jolda básekiden qorıqpayman. Úyrenemen, usı tarawǵa kirip jumıs islewdi baslamaqshı bolǵan hár bir isbilermenge járdem beriwge tayarman, – deydi jas isbilermen T.Panaev.
– Bul biznes-sapar hám seminar-trening isbilermenler ushın ámeliy bilim, jańa tájiriybe hám ilham deregi bolıp, jergilikli óndiristi jáne de rawajlandırıw hám básekige shıdamlı ónimler tayarlaw jolında ayrıqsha áhmiyetke iye boldı, – deydi ÓzLiDeP Qaraqalpaqstan Respublikası Keńesiniń bólim baslıǵı Klara Xudaybergenova.
Isbilermenler bul baǵdardaǵı jumıslardı jolǵa qoyıw, rawajlandırıw máseleleri boyınsha óz-ara pikir alısıp, qızıqtırǵan sorawlarına juwap aldı.

Qaraqalpaqstan xabar agentligi