Ózbekstan Respublikası Prezidentiniń 2021-jıl 3-fevraldaǵı «2017-2021-jıllarda Ózbekstan Respublikasın rawajlandırıwdıń bes baslı baǵdarı boyınsha Háreketler strategiyasın «Jaslardı qollap-quwatlaw hám xalıq salamtlıǵın bekkemlew jılı»nda ámelge asırıwǵa baylanıslı mámleketlik baǵdarlaması haqqında»ǵı Pármanına muwapıq, Taxtakópir rayonındaǵı Qaraoy APJ aymaǵınan 3 gektar jer maydanı ajıratılıp, «Jaslar sanaat hám isbilermenlik zonası» shólkemlestirilgen edi.

Sonday-aq, usı aymaqta jas isbilermenler ushın qolaylı sharayatlar jaratıw, óndiris hám isbilermenlik jumısın rawajlandırıw maqsetinde Qaraqalpaqstan Respublikası Joqarǵı Keńesi Prezidiumınıń arnawlı qararı tiykarında, Isbilermenlik infrastrukturasın rawajlandırıw qorınıń qarjıları esabınan 1 milliard 440 million sum qarjı ajıratıldı. Házirgi kúnleri usı ajıratılǵan qarjılar esabınan jaslar sanaat hám isbilermenlik zonasına alıp barıwshı hám aymaq ishindegi 1,2 kilometr avtomobil jolların asfaltlaw jumısları basqıshpa-basqısh ámelge asırılmaqta.
Álbette, ámelge asırılıp atırǵan bul infrastrukturalıq joybar aymaqta jańa jumıs orınların jaratıw, jaslardıń bántligin támiyinlew hám isbilermenlik jumısın jáne de keńeytiwge tiykar boladı.

Qaraqalpaqstan xabar agentligi