Kegeyli rayonında ótip baratırǵan jıldıń juwmaqlarına baǵıshlanǵan «Xoshamet-2025» sıylıqlaw máresimi bolıp ótti.
Máresimde rayon hákimi Aybek Kamalov usı jıl dawamında aymaqtı sociallıq-ekonomikalıq rawajlandırıw boyınsha islengen jumıslar, bilimlendiriw, densawlıqtı saqlaw, awıl xojalıǵı hám basqa da qolǵa kirgizilgen tabıslar haqqında aytıp, aldaǵı waqıtları bunnan da joqarı jetiskenliklerge erisiwine tilekleslik bildirdi.

Ilajda rayonnıń sociallıq-ekonomikalıq jaqtan rawajlanıwına ózleriniń salmaqlı úleslerin qosqan bir qatar taraw wákilleri hár qıylı nominaciyalar boyınsha jeńimpaz dep tabılıp, rayon hákimligi tárepinen múnásip túrde sıylıqlandı.
– Búgingi ótkerilgen ilajda bilimlendiriw tarawında qolǵa kirgizgen jetiskenliklerim inabatqa alınıp, «Jıldıń eń jaqsı mektep direktorı» nominaciyası boyınsha jeńimpaz dep tabıldım, – deydi 55-sanlı ayırım pánlerdi tereńlestirip oqıtatuǵın klası bar ulıwma orta bilim beriw mektebi direktorı Axmed Utepbergenov. – 2022-2023-oqıw jılında mektebimiz oqıwshıları «Shet tillerin oqıtıw boyınsha eń jaqsı mektep» tańlawınıń Qaraqalpaqstan Respublikalıq basqıshında sıylı III orındı iyelep 150 mln sumlıq sertifikattı jeńip alǵan bolsaq, 2023-2024-oqıw jılında I orındı jeńip alıwǵa miyasar boldıq hám 250 mln sumlıq sıylıqtı qolǵa kirgizdik. Jeńimpaz oqıwshılarımız bolsa, bıyılǵı oqıw jılı Angliya paytaxtı London qalasına sayaxatqa barıp qayttı. Aldaǵı waqıtları da ózlerimizge bildirilgen isenimdi tolıq aqlap, bunnan da joqarı nátiyjelerdi qolǵa kirgiziw ushın ayanbastan miynet ete beremiz.
Kegeyli rayonında ótkerilgen «Xoshamet-2025» sıylıqlaw máresimi taraw pidayıların jańa jetiskenliklerge qaray ruwxlandırıp, olarǵa keleshektegi maqsetleri ushın bekkem isenim baǵıshladı.

Adilbay Orazov,
Qaraqalpaqstan xabar agentligi sholıwshısı.