Keyingi jılları kúndelikli turmıs tárizimizge “Jasıl mákan,” “Jasıl ekonomika,” “Jasıl energiya,” “Jasıl shańaraq,” “Bilimlendiriw ushın qolaylı ortalıq,” “Bes baslama olimpiadası,” “Olimpiada shıńları” sıyaqlı onlaǵan atamalar, joybarlar kirip keldi, bul tek ǵana mámleketlik shólkemlerde miynet etip atırǵan qánigelerdi emes, al mámleketimizdegi barlıq tarmaqlardı, xalıqtıń qatlamların birden-bir maqsetke birlestiriwge zárúr sharayattı jarattı.

Mámleketimiz basshısınıń “Ózbekstan – 2030” strategiyasın “Qorshaǵan ortalıq hám “jasıl ekonomika” jılında ámelge asırıwǵa baylanıslı mámleketlik baǵdarlama haqqında”ǵı pármanında sport arqalı xalıqtıń salamatlıǵın bekkemlew, xalıqaralıq maydanda básekige shıdamlı saylandı komandalardı qáliplestiriw tiykarǵı maqsetlerden biri etip belgilengen.
Bıyıl Olimpiada oyınları baǵdarlamasına kirgizilgen sport túrleri boyınsha Ózbekstan milliy saylandı komandası aǵzalarınıń 250 den aslam abıraylı xalıqaralıq jarıslarda múnásip qatnasıwı támiyinlendi. Atap aytqanda, III Jaslar Aziya oyınları, VI Islam tileklesligi oyınları, jaslar arasındaǵı paraaziya oyınları, sonday-aq, olimpiada sport túrleri boyınsha Aziya hám jáhán chempionatları, xalıqaralıq jarıslarda mámleketimizdiń 500 den aslam jankúyer sportshılarınıń qatnasıwı ushın zárúr sharayatlar jaratıldı.
Artta qalıp atırǵan 2025-jıl dawamında dzyudo, taekvondo WT, qılıshlasıw, gimnastika, júziw, erkin gúres, hayal-qızlar gúresi, grek-rim gúresi, akademiyalıq eskek esiw hám awır atletika boyınsha milliy saylandı komanda aǵzaları Olimpiada baǵdarlamasına kirgizilgen sport túrleri boyınsha 20 ǵa shamalas jáhán chempionatında qatnastı. Milliy saylandı komandamız wákilleri Aziya hám jáhán chempionatlarında 500 den aslam medallardı qolǵa kirgizip, Ózbekstan sportınıń xalıqaralıq abırayın jáne de arttırdı.
Milliy sportımız gúresti dúnya kóleminde ǵalaba en jaydırıw baǵdarında salmaqlı jumıslar ámelge asırıldı. Bıyıl jaslar arasındaǵı Aziya oyınları hám “Islam tileklesligi” oyınlarında gúres jarısları ótkeriliwi, kóplegen mámleketlerde xalıqaralıq turnirler shólkemlestiriliwi artınan jáhán sport maydanlarında ózbek tilindegi sózler jańladı. Bayraǵımızdan jıltıraǵan gúres shapanlarında chempionlar hám sıylı orın iyeleri anıqlandı. Olarda 1 800 den aslam sportshı qatnastı. Bul gúrestiń kontinentler kesiminde barǵan sayın keńnen ǵalaba en jayıp atırǵanınan derek beredi.
Olimpiada háreketiniń áhmiyetli baǵdarlarınan biri – millionlar oyını futbolı boyınsha shuǵıllanıwshılardıń sanı 32 mıń 333 ke jetkerilip, básekige shıdamlı futbolshılar rezervi qáliplestirildi.
Bul háreketler Ózbekstanda olimpiada háreketin sapa jaǵınan jańa basqıshqa alıp shıqpaqta. Saylandı komandalarımızdıń iri xalıqaralıq arenalardaǵı qatnasıwı, medallardıń ósip baratırǵan sanı hám sport infrastrukturasınıń keńeyiwi dúnya sport kartasında jańa Ózbekstannıń kelbetin jáne de ayqın kórsetpekte.
Elimizde denetárbiya hám sporttı ǵalaba en jaydırıw, qábiletli jaslardı erte anıqlaw hám olardı professional sportqa baǵdarlaw mámleketlik siyasattıń tiykarǵı baǵdarına aylanǵan. 2025-jıldıń juwmaqlarına bola, sport bilimlendiriw mákemelerine qosımsha 58 mıń 482 qábiletli sportshı jas qabıl etilip, nátiyjede turaqlı shuǵıllanatuǵın jaslardıń sanı 11,5 procentke arttı.
Bul process sońǵı jılları sport bilimlendiriwi sistemasında alıp barılıp atırǵan reformalardıń logikalıq dawamı bolıp esaplanadı. Elimiz boylap 300 den aslam sport mektepleri hám qánigelestirilgen sport-bilimlendiriw mákemeleriniń shólkemlestirilip atırǵanı denetárbiya hám sport penen turaqlı shuǵıllanıwshılardıń úlesi 30 procentke jetiwine tiykar jarattı.
Bar sport mekteplerinde xalıqtıń sanı hám aymaqlardıń qánigelesiwin esapqa alǵan halda olimpiada sport túrleri boyınsha 200 den aslam jańa sport sekciyaları jumıs basladı. Sonıń ishinde, Qaraqalpaqstan Respublikasında 14, Ándijan hám Jizzaq wálayatlarında 16, Buxara wálayatında 18, Qashqadárya hám Surxandárya wálayatlarında 16, Nawayı wálayatında 13, Namangan wálayatında 11, Samarqand wálayatında 9, Sırdárya, Ferǵana hám Tashkent qalasında 18, Tashkent wálayatında 17, Xorezm wálayatında 12 jańa sekciyalar jolǵa qoyıldı.
Aymaqlarda sport mektepleri tiykarında zamanagóy shınıǵıw zalları hám arnawlı maydanshalar qurılıp atırǵanı, ayırım rayonlarda bolsa sport mektepleri rekonstrukciyalanıp, sport túri hám toparlarınıń sanı keskin arttırılıp atırǵanı baqlanbaqta. Ǵalabalıq sport jarısları arqalı bolsa jaslar hám xalıqtıń qatlamların qamtıp alıw kólemi 12 millionǵa jetkerildi.
Bul kórsetkishler Ózbekstanda mıńlaǵan qábiletli ul-qızlar ushın zamanagóy sport infrastrukturası jaratılıwına xızmet etedi hám professional trenerler mektebine keńnen jol ashılıp atırǵanın kórsetpekte.

Twlqin RWZIEV, ÓzA