Prezident janındaǵı Basqarıw nátiyjeliligi agentligi hám BMShtıń Azıq-awqat hám awıl xojalıǵı shólkemi (FAO) baslaması menen mámleketlik uyımlar hám shólkemlerdiń kadrlar menen islesiw bólimleriniń basshıları ushın oqıw-seminar shólkemlestirildi. Onda shólkemniń basshıları, juwapkerler, FAO wákilleri, ministrlikler hám uyımlardıń HR bólimleriniń basshıları qatnastı.

Ilajda Basqarıw nátiyjeliligi agentliginiń basshıları mámleketlik basqarıwda nátiyjelilikke erisiw, bárinen burın, insan resursların durıs basqarıwǵa baylanıslı ekenligine ayrıqsha itibar qarattı.
HR xızmetkerleri sistemadaǵı barlıq reformalardıń ámeldegi háreketlendiriwshi kúshi bolıp esaplanadı. Olar kadrlar potencialın bahalaw, durıs jaylastırıw, xoshametlew hám xızmet jumısın rejeli tallaw arqalı mámleketlik uyımlarda nátiyjege baǵdarlanǵan basqarıw mádeniyatın qáliplestiredi.
Usı mániste, insan resursların basqarıw tarawındaǵı professional qatnas mámleketlik uyımlardıń strategiyalıq wazıypaların orınlaw, puqaralarǵa sapalı xızmet kórsetiw hám sistemanıń turaqlı nátiyjeliligin támiyinlewde sheshiwshi áhmiyetke iye.
HR tarawına innovaciyalıq qatnaslardı engiziw bolsa mámleketlik xızmette jańa áwlad basshıların tayarlaw hám ulıwma basqarıwdıń sapasın joqarı basqıshqa alıp shıǵıwdıń tiykarǵı faktorı bolıp esaplanadı.
Mámleketimiz basshısınıń “Mámleketlik xızmette basqarıw nátiyjeliligin bunnan bılay da arttırıw ilajları haqqında”ǵı pármanınıń mazmun-mánisi, tarawdaǵı zárúrligi hám áhmiyeti, belgilengen ilajlardı ámelge asırıwda HR qánigeleri aldında turǵan áhmiyetli wazıypalar haqqında tolıq maǵlıwmat berildi.
Mámleketlik basqarıwda nátiyjelilik, proaktiv basqarıw hám nátiyjege qaratılǵan qatnastıń zamanagóy tendenciyaları dodalandı.
Oqıw-seminar mámleketlik basqarıw tarawında ámelge asırılıp atırǵan reformalardı qollap-quwatlaw, kadrlar menen islesiw sistemasın jetilistiriw hám HR processlerinde birden-bir normalardı engiziwge qaratıldı.
Qatnasıwshılar operativ qarar qabıl etiw mexanizmleri, kadrlar siyasatı hám mámleketlik xızmetti professionallastırıwdıń jańa baǵdarları menen tanıstı.
BMShtıń Azıq-awqat hám awıl xojalıǵı shólkemi (FAO) wákilleri tárepinen gender siyasatın jetilistiriw, awıl xojalıǵı hám azıq-awqat qáwipsizligine baylanıslı xalıqaralıq kózqaraslar tallandı.
Bul prezentaciyalar qatnasıwshılarǵa globallıq ózgerisler hám milliy zárúrlikler arasındaǵı óz-ara baylanıstı tereń tallaw imkaniyatın berdi. Bunnan tısqarı, sırt elde bilim alǵan qánigelerdi mámleketlik basqarıwǵa tartıw hám olardıń jumısın xoshametlewge qaratılǵan zamanagóy mexanizmler dodalandı.
Oqıwdıń ámeliy bólimi sıpatında qatnasıwshılar “Artel” iri jeke menshik kompaniyasında HR ámeliyatı hám talent management processleri menen tanısadı. Tashkent qalasındaǵı “IT-park”te zamanagóy kadrlardı basqarıw, xızmetkerlerdi tańlaw hám jumısqa qabıl etiw, jumıs nátiyjeliligin bahalaw processlerin tikkeley baqlaydı.

N.Abduraimova, W.Hayitov (súwret), ÓzA