Usı jıldıń 9 ayı dawamında mámleketimizde toǵay xojalıqları tárepinen 200 gektar paydalanılmay atırǵan jer maydanları ózlestirilip, toǵay fondındaǵı 151,4 mıń gektar maydanda toǵayzarlar jaratılǵan. “Jasıl mákan” ulıwma milliy joybarı sheńberinde Qaraqalpaqstan Respublikası aymaǵında 71,9 mıń, Buxara wálayatında 22,3 mıń, Nawayı wálayatında 16 mıń, Xorezm wálayatında 15 mıń gektar maydanda “jasıl qaplamalar” jaratılǵan.

Sonday-aq, 815,6 mıń gektar egislik maydanlarında suwdı únemleytuǵın texnologiyalar engizilgen. Irrigaciya hám melioraciya tarawlarında belgili jumıslar ámelge asırılǵan.
Bul haqqında parlamenttiń tómengi palatasındaǵı Ózbekstan Ekologiyalıq partiyası frakciyasınıń májilisinde aytıp ótildi. Onda deputatlar Mámleketlik byudjet hám mámleketlik maqsetli qorları byudjetleriniń 2025-jıldıń toǵız ayındaǵı orınlanıwın dodaladı. Frakciya aǵzaları tiykarǵı itibardı ekologiya hám qorshaǵan ortalıqtı qorǵaw tarawındaǵı ámeliy jumıslarǵa qarattı.
Bunnan soń deputatlar ekologiya, qorshaǵan ortalıqtı qorǵaw hám tábiyattan paydalanıw tarawındaǵı huqıqbuzarlıqlardı tártipke salıwǵa qaratılǵan nızam joybarın kórip shıqtı.
Atap ótilgenindey, bul nızam joybarındaǵı normalar ekologiya, qorshaǵan ortalıqtı qorǵaw hám tábiyattan paydalanıw tarawındaǵı nızamshılıq talaplarınıń buzılıwın saplastırıwǵa qaratılǵan.
Sonday-aq, nızam joybarında yuridikalıq táreplerge qorshaǵan ortalıqqa jetkerilgen zıyan muǵdarına sáykes finanslıq sankciyalar engiziw arqalı juwapkershiliktiń sózsizligin támiyinlewge qaratılǵan normalar názerde tutılmaqta.
Eko frakciya aǵzaları bul nızam joybarı qorshaǵan ortalıqtı qorǵaw, insan salamatlıǵına unamsız tásir etiwshi faktorlardı azaytıwǵa xızmet etetuǵının atap ótti. Bir qatar pikir-usınıslar bildirilip, hújjet joybarı qollap-quwatlandı.

Muhtarama Komilova, ÓzA