Oliy Majlis Nızamshılıq palatasındaǵı Ózbekstan “Adolat” social-demokratiyalıq partiyası frakciyasınıń gezektegi májilisinde dáslep Mámleketlik byudjet hám mámleketlik maqsetli qorları byudjetleriniń 2025-jıldıń 9 ayı dawamındaǵı orınlanıwı dodalandı.

Bul esabat haqqında ekonomika hám qarjı ministriniń orınbasarı Otabek Fozilkarimov tolıq maǵlıwmat berdi.
Byudjet esabatında aytılıwınsha, 2025-jıldıń 9 ayında jalpı ishki ónim 7,6 procentke ósken. Esap beriw dáwirinde sociallıq qárejetler ushın Mámleketlik byudjetten 125,5 trln. sum yamasa ótken jıldıń sáykes dáwirine salıstırǵanda 17,6 trln. sumǵa kóp qarjı ajıratılǵan.
Atap ótilgenindey, esap beriw dáwirinde 455 mektepte ońlaw hám rekonstrukciyalaw jumısları ámelge asırılıp, bunıń ushın mámleketlik byudjetten 2 trillionnan aslam qarjı ajıratılǵan. 95 medicinalıq mákemede ońlaw jumısları ámelge asırılǵan. Xalıqtı suw menen támiyinlew, máhállelerdi abadanlastırıw maqsetlerine hámde kommunal hám jol xojalıǵı sistemasına qarjılar ajıratılıp, belgili jumıslar orınlanǵan.
Dodalawlarda frakciya aǵzaları byudjettiń orınlanıwında nátiyjelilikti arttırıw, qarjılardan maqsetli paydalanıw, sonday-aq, baǵdarlanǵan byudjet qarjıların óz waqtında ózlestiriw máselelerinde bir qatar máselelerdi kóterdi.
Atap aytqanda, deputat Narimon Umarov bir qatar baǵdarlarǵa ajıratılǵan byudjet qarjıları ministrlikler hám uyımlar tárepinen óz waqtında ózlestirilmegenine túsinik soradı. Deputattıń aytıwınsha, onkologiyalıq kesellikler ushın názerde tutılǵan qarjılardıń 67 procenti, mádeniy miyrastı saqlaw ushın ajıratılǵan qarjılardıń 78 procenti, muzeyler jumısı ushın názerde tutılǵan qarjılardıń 47 procenti, Sport ministrligine ajıratılǵan qarjılardıń 13 procenti, Energetika ministrligine baǵdarlanǵan qarjılardıń 63,8 procenti ǵana ózlestirilgen. Deputat toǵız ay dawamında nege bunshelli az qarjılar ózlestirilgeniniń sebebi menen qızıqsındı.
Buǵan juwap retinde ekonomika hám qarjı ministriniń orınbasarı Otabek Fozilkarimov ayırım jaǵdaylarda tarawlardaǵı talaplardı anıqlaw, rejelestiriwde mashqalalardıń bar ekenligin, bul baǵdarda sanlastırıw procesi ámelge asırılıp atırǵanın málim etti.
Sonday-aq, jıl dawamında qosımsha tapsırmalardan kelip shıǵıp, tarawlarǵa qosımsha qarjılar ajıratılıp atırǵanın aytıp ótti.
Frakciya aǵzaları jáne bir qatar sorawlardı ortaǵa taslap, tiyisli juwaplar aldı.
Májiliste bir qatar nızam joybarları da kórip shıǵılıp, tiyisli qararlar qabıl etildi.

Muhtarama Komilova, ÓzA