Elimizde denetárbiya hám sport háreketi jańa basqıshqa kóterilip atırǵanı xalıqaralıq maydanda erisilip atırǵan tabıslarda óz kórinisin tappaqta.

Ótip baratırǵan jıl dawamında elimiz sportshıları bir qatar kompleksli jarıslarda úlken nátiyjelerge eristi. Olimpiada hám paralimpiya baǵdarındaǵı sport túrlerindegi 50 den aslam jáhán hám kontinent chempionatlarında 700 ge shamalas medallar dizbegin qolǵa kirgizgeni Ózbekstan sportınıń xalıqaralıq abırayı jıldan-jılǵa joqarılap atırǵanın kórsetti.
Kúni keshe Birlesken Arab Ámirliklerinde 35 mámlekettiń 1 mıń 312 jas para sportshıları qatnasqan mawasasız bellesiwlerde mártlik hám erk-ıqrar iyesi bolǵan watanlaslarımız 99 altın, 57 gúmis hám 41 qola medalına iye bolıp, ulıwma komandalıq esapta 1-orındı iyelegeni Jańa Ózbekstan jaslarınıń potencialın jáne bir márte kórsetti.
Paytaxtımızdaǵı Olimpiada qalashasında V Jaslar Paraaziya oyınlarında elimizdiń abırayın múnásip qorǵaǵan jas para sportshılar hám olardıń trenerlerin sıylıqlawǵa baǵıshlanǵan saltanatlı máresim bolıp ótti.
Ilajda Ózbekstan Respublikası Prezidenti Shavkat Mirziyoevtiń V jaslar Paraaziya oyınlarında qatnasqan jas para sportshılarımızǵa jollaǵan qutlıqlawın Oliy Majlis Senatınıń Baslıǵı Tanzila Norboeva oqıp esittirdi.
Ilajda qatnasqan Ózbekstan Respublikası Prezidentiniń sport boyınsha wákili Odil Abdurahmonov, Ózbekstan Respublikası Prezidentiniń keńesgóyi, Sociallıq qorǵaw milliy agentliginiń direktorı Mansur Olloyorov hám sport jámiyetshiliginiń wákilleri jas para sportshılarımızdıń erisken tabısı 2026-jılǵı jáhán hám kontinent chempionatları, sonday-aq, Paraaziya hám Paralimpiya oyınlarındaǵı kórsetkishlerge unamlı tásir kórsetiwi menen áhmiyetli ekenin atap ótti.
Usı jerde jáne bir gáp. Bunnan tórt jıl aldın Baxreynde ótken IV Jaslar Paraaziya oyınlarında Ózbekstan sportshıları 11 altın, 1 gúmis, 4 qola, jámi 16 medal menen ulıwma komandalıq esapta 6-orındı iyelegen edi.
Elimizdiń erk-ıqrarlı jas para sportshıları 2009-jılı Yaponiyanıń Tokio qalasında ótken Paraaziya oyınlarında birinshi márte 2 sport túrinen 11 sportshı menen qatnasıp, 4 altın, 3 gúmis, 1 qola medallarına iye bolǵan hám ulıwma komandada 13-orındı iyelegen.
2013-jılı Kuala-Lumpur qalasında (Malayziya) ótkerilgen II Jaslar arasındaǵı Paraaziya oyınlarında Ózbekstan sport delegaciyası 4 sport túrinen 15 sportshı menen qatnasıp, 6 altın, 4 gúmis hám 2 qola medalı jaǵdayında 13-orındı iyelegen.
2017-jılı Dubay qalasında (BAÁ) shólkemlestirilgen III Paraaziya oyınlarında bolsa watanlaslarımız 3 sport túrinen 17 sportshı menen qatnasıp, 20 altın, 6 gúmis hám 2 qola toplaǵan hám 4-orındı iyelegen edi.
Tórt jıllıq olimpiada dáwirinde para sport túrlerinde elimizdiń jas para sportshıları ulıwma esapta 99 altın medalǵa iye bolıwında trener-qánigelerdiń mashaqatlı miyneti, izlenisleri, durıs kórsetpeleri áhmiyetli faktor bolǵanı sır emes.
Mámleketimiz basshısınıń qutlıqlawında atap ótilgenindey, bul jeńis, tariyxıy nátiyje mıńlaǵan jaslarımızǵa maqtanısh, umtılıs hám ilham deregi, úlken tájiriybe mektebi bolıp xızmet etiwi menen áhmiyetli bolıp esaplanadı.

Twlqin RWZIEV,
Javohir TOShXWJAEV,
ÓzA