Kegeyli rayonınıń Júzimbaǵ awıl puqaralar jıyını aymaǵında jaylasqan «Bekzad-Azat» fermer xojalıǵında awıl xojalıǵında suw resurslarınan nátiyjeli paydalanıw hám suwdı únemleytuǵın suwǵarıw texnologiyaların keńnen engiziw máselelerine baǵıshlanǵan kórgizbeli seminar shólkemlestirildi.

Onda Ózbekstan Respublikası Prezidentiniń keńesgóyi Shuhrat Ǵaniev hám Qaraqalpaqstan Respublikası Ministrler Keńesi Baslıǵınıń awıl hám suw xojalıǵı boyınsha orınbasarı, awıl xojalıǵı ministri Shuhrat Teshaev hám basqalar shıǵıp sóylep, awıl xojalıǵında suwdı únemleytuǵın zamanagóy suwǵarıw usılların, sonıń ishinde, quyash panelleri arqalı isleytuǵın «KAVSAR» sisteması texnologiyaların ámeliyatqa engiziw máselelerin hár tárepleme dodaladı. Qatnasıwshılarǵa bul texnologiyalardıń abzallıqları, suw resurslarınan paydalanıw nátiyjeliligin arttırıwdaǵı ornı hám ekonomikalıq jaqtan paydalılıǵı boyınsha túsinikler berdi.
– Kórgizbeli seminar awıl xojalıǵında suwdı únemleytuǵın texnologiyalardı keńnen engiziw, fermerlerdiń bilim hám tájiriybesin arttırıw, suw resurslarınan aqılǵa uǵras paydalanıwdı támiyinlewge xızmet etetuǵını menen áhmiyetli boldı, – deydi Shımbay rayonı hákiminiń orınbasarı Islam Qayıpnazarov. – Aldaǵı waqıtları seminarda aytılǵan pikirlerdi rayonımız aymaǵında jaylasqan xojalıqlarda da qollanıw ushın fermerler hám isbilermenler arasında úgit-násiyat jumısların júrgizemiz. Sebebi, «KAVSAR» sisteması tek elektr energiyasın únemlep qoymastan, qarjı tárepinen de paydalı eken.
Sonday-aq, ilaj dawamında fermer xojalıqları basshıları hám awıl xojalıǵı ónimlerin islep shıǵarıwshılar juwapker basshılarǵa ózleriniń pikir hám usınısların bildirip, bildirilgen múrájatlar boyınsha juwapker ministrlikler hám uyımlardıń basshılarına tapsırmalar berildi hám olardıń orınlanıwı ayrıqsha qadaǵalawǵa alınatuǵını atap ótildi.

Adilbay Orazov,
Qaraqalpaqstan xabar agentligi sholıwshısı