Nókis qalasındaǵı 46-sanlı ayırım pánler tereńlestirilip oqıtılatuǵın ulıwma orta bilim beriw mektebinde ruwxıy-aǵartıwshılıq ilajlar sheńberinde 14-dekabr – Qaraqalpaqstan Respublikası Mámleketlik bayraǵı qabıl etilgeniniń 33 jıllıǵı múnásibeti menen bayram keshesi ótkerildi.

Onda Respublikalıq Ruwxıylıq hám aǵartıwshılıq orayı Nókis qalalıq bóliminiń baslıǵı Q.Nuratdinov, Arqa-batıs áskeriy okruginiń 17071-áskeriy bóliminiń wákilleri M.Xudaybergenov, U.Mirzanov, D.Amirov, A.Yuldashev hám Nókis qalalıq 1-sanlı Esjan baqsı atındaǵı balalar muzıka hám kórkem óner mektebiniń oqıtıwshıları X.Seytnazarov hám A.Qaypanovlar qatnastı. Ilajda mámleketlik nıshınnıń áhmiyeti hám oǵan hár bir puqara húrmet penen qarawı lazım ekenligi atap ótildi.
Ilajda baslawısh klass oqıwshıları bayram sánesine baǵıshlanǵan qosıqlar oqıp, miymanlarǵa ózleri salǵan súwretlerdi sawǵa etti. Sonday-aq, muzıka mektebiniń oqıtıwshıları hám oqıwshıları milliy qaraqalpaq qosıqların duwtarda atqardı.
Bayram sońında ilaj qatnasıwshıları klasslarǵa kirip, oqıwshılardı qutlıqladı hám Qaraqalpaqstan Respublikasınıń bayraqların tapsırdı.

Qaraqalpaqstan xabar agentligi