Hindstannıń jetekshi sawda-sanaat palatalarınan biri – «PHD Chamber of Commerce and Industry» (PHD CCI) da Ózbekstan elshixanası tárepinen mámleketimizdiń sawda-ekonomikalıq hám investiciyalıq imkaniyatlarına baǵıshlanǵan dógerek sáwbeti shólkemlestirildi.

Ilajda Hindstannıń 20 dan aslam jetekshi kompaniyalarınıń basshıları hám wákilleri qatnastı. Bul hind isbilermen toparlarınıń mámleketimiz bazarına qızıǵıwshılıǵı artıp atırǵanınan derek beredi.
Prezentaciya dawamında diplomatiyalıq missiya wákilleri hám Nókisten barǵan ekspertler hindstanlı sheriklerdi Ózbekstanda sırt el investiciyaları ushın qolaylı ortalıq jaratıp atırǵan basqıshpa-basqısh reformalar menen hár tárepleme tanıstırdı.
Dodalawlardıń oraylıq teması Qaraqalpaqstan Respublikasında isbilermenlik jumısın júrgiziw ushın usınılıp atırǵan siyrek ushırasatuǵın imkaniyatlar boldı.
Hindstannıń biznes jámiyetshiligi wákillerine Qaraqalpaqstanda sırt elli investorlar paydalanıwı múmkin bolǵan tiykarǵı abzallıqlar haqqında tolıq maǵlıwmatlar berildi. Atap aytqanda, Prezidentimiz tárepinen Qaraqalpaqstan Respublikası ushın jaratılǵan imkaniyatlar, qosımsha salıq hám bajıxana jeńilliklerin názerde tutatuǵın arnawlı huqıqıy rejim, tayar infrastrukturaǵa iye arnawlı ekonomikalıq zonalar hám sanaat parklerinde kárxanalardı shólkemlestiriw imkaniyatları, jer ijarasınıń jeńilletilgen shártleri hám joybarlardı mámleket tárepinen hár tárepleme qollap-quwatlaw, sonıń ishinde, investiciyalardı qorǵaw kepillikleri haqqında sóz boldı.
Birgeliktegi joybarlardı ámelge asırıw ushın perspektivalı baǵdarlar sıpatında toqımashılıq sanaatı, farmacevtika hám medicina úskenelerin islep shıǵarıw, málimleme texnologiyaları hám autsorsing, ximiya sanaatı, “jasıl” energetika hám turizm tarawları belgilep alındı.

Qaraqalpaqstan xabar agentligi