“Isbilermenlik subektlerine mámleketlik, professional, konsalting, finanslıq, injiniring, marketing, media, IT hám operaciyalıq xızmetlerdi kompleksli kórsetiw sistemasın engiziw ilajları haqqında”ǵı Prezident qararı (PQ-375-sanlı, 13.12.2025-j.) qabıl etildi. Bul haqqında “Huquqiy axborot” Telegram-kanalı xabar berdi.

Málim etiliwinshe, tómendegiler usı qarardı qabıl etiwden gózlengen tiykarǵı maqsetler etip belgilendi:
• 1000 nan aslam mámleketlik hám jeke menshik xızmetlerdi “bir ayna” principi tiykarında kórsetiwdi jolǵa qoyıw arqalı isbilermenlerdiń jumısına tolıq járdemlesiw sistemasın engiziw;
• isbilermenlerdiń máselelerin hám mashqalaların tıńlaw, dodalaw hám ornında sheshiwge mólsherlengen sapa jaǵınan jańa maydansha jaratıw.
Sonday-aq, usı qararǵa bola, 2026-jıl 1-marttan isbilermenlik jumısına baylanıslı mámleketlik xızmetler hám ayırım jeke menshik xızmetlerdi isbilermenlerge “bir ayna” principi tiykarında kórsetiw boyınsha “Biznes sherik” joybarı ámelge asırıladı.
“Biznes sherik” joybarı sheńberinde:
• Sawda-sanaat palatası janında shólkemlestiriletuǵın juwapkershiligi sheklengen jámiyeti tárepinen basqarılatuǵın “Biznes sherik” oraylarınıń jumısı jolǵa qoyıladı;
• dáslepki basqıshta “Biznes sherik” orayları Tashkent hám Nókis qalalarında jáne wálayatlar oraylarında birewden shólkemlestiriledi.

Qaraqalpaqstan xabar agentligi