Qaraqalpaqstan Respublikası Ayrıqsha jaǵdaylar basqarmasında «Puqaralardıń órt hám ayrıqsha jaǵdaylardan, hawa-gaz aralaspasınıń jarılıwınıń, záhárli gazden zıyanlanıwınıń aldın alıw boyınsha ilajlar» hám «Korrupciyalıq jaǵdaylardıń aldın alıw» temasında baspasóz konferenciyası hám «Ashıq esikler kúni» ótkerildi.

Ilajda keń jámiyetshilik, ǵalaba xabar qurallarınıń wákilleri, taraw juwapkerleri hám jaslar qatnastı.
«Órt qáwipsizligi aylıǵı» hám «Aksilkorrupciya aylıǵı» sheńberinde shólkemlestirilgen ilaj dawamında máwsimge kórilgen tayarlıq jumısları, puqaralardı órt hám ayrıqsha jaǵdaylardan qorǵaw, záhárli gazden zıyanlanıwdıń aldın alıw boyınsha ámelge asırılıp atırǵan ilajlar haqqında keń túrde maǵlıwmat berildi.
Sonday-aq, sistemada korrupciyalıq jaǵdaylardıń aldın alıw máselesine itibar qaratıldı.
Konferenciya dawamında Qaraqalpaqstan Respublikası Ayrıqsha jaǵdaylar basqarması baslıǵınıń birinshi orınbasarı polkovnik B.Orazbaev, bólim baslıqları, mayor A.Abdiraxmanov, kapitan A.Yusupov, kapitan B.Sultaniyazov hám basqalar jurnalistler hám jaslardı qızıqtırǵan barlıq sorawlarǵa juwap qaytardı.
Bunnan tısqarı, qatnasıwshılar qutqarıwshılardıń arnawlı ásbap-úskeneleri, olardıń ámeliy shınıǵıwları hám órt-qutqarıw texnikaları menen de jaqınnan tanıstı.
Ayrıqsha jaǵdaylarda xabardar etiw ilajları hám órt óshiriw hám qutqarıw ilajların alıp barıw ushın mólsherlengen arnawlı texnikalar hám ásbap-úskenelerdiń texnikalıq qásiyetleri túsindirip berildi jáne tarawǵa baylanıslı úgit-násiyat materialları tarqatıldı.
Jaslar arnawlı texnikalar hám ásbap-úskenelerden paydalanıp kórdi. Sonday-aq, ilaj sheńberinde jaslarǵa kontrakt tiykarında áskeriy xızmetke qabıllaw tártibi, olarǵa qoyılatuǵın ulıwma talaplar haqqında da maǵlıwmat berilip, tarawǵa baylanıslı tayarlanǵan prezentaciyalar hám videorolikler qoyıp berildi.

Qaraqalpaqstan xabar agentligi