Múnásibet

Búgingi kúnde Prezidentimizdiń baslaması menen elimizde ámelge asırılıp atırǵan túpkilikli reformalar, ásirese, ruwxıy-aǵartıwshılıq tarawda bolıp atırǵan keń kólemli jańalanıwlar xalıqaralıq maydanda joqarı tán alınbaqta. Ózbekstandaǵı ózgerisler tek ǵana ekonomikalıq reformalar menen sheklenip qalmastan, al jámiyettiń ruwxıy hám xalıq sanasınıń joqarılawına tiykarlanǵan strategiyanı da ózinde jámlestirmekte. Pakistanlı jurnalist hám jazıwshı Muhammad Abbos Xonnıń “Ózbekstan: Úshinshi Renessans – rawajlanıw koncepti” atamasındaǵı kitabı Jańa Ózbekstan rawajlanıwınıń ideyalıq, ruwxıy hám ámeliy tiykarların ashıp beretuǵın áhmiyetli dereklerden biri bolıp esaplanadı. Shıǵarmada mámleketimiz tariyxındaǵı ullı oyanıw dáwirleri – Birinshi hám Ekinshi Renessans miyrası talqılanıp, olardıń tiykarında Úshinshi Renessans ideyasınıń mazmun-mánisi tereń sáwlelendirilgen. Kitap oqıwshını tek ǵana tariyxıy pikirlewge emes, al keleshek haqqında jedel pikir júrgiziwge shaqıradı. Shıǵarmada Úshinshi Renessans ideyası Jańa Ózbekstandı qurıwdaǵı strategiyalıq maqset sıpatında talqılanadı.
Avtordıń atap ótkenindey, bul process tek ǵana ekonomikalıq ósiw yamasa texnikalıq rawajlanıw menen sheklenip qalmay, al insan kapitalın rawajlandırıw, ruwxıy rawajlanıw hám intellektuallıq potencialdı arttırıwdı óz ishine aladı. Ásirese, ilim, bilimlendiriw hám innovaciyalardıń ústin áhmiyetke iye ekeni kitaptıń tiykarǵı ideyalarınan biri sıpatında kórinedi. Avtor shıǵarmada Ózbekstannıń sońǵı jıllarda siyasiy, ekonomikalıq, sociallıq hám ruwxıy tarawlarda ámelge asırılıp atırǵan keń kólemli reformaları sistemalı hám úzliksiz túrde rawajlanıp atırǵanın ayrıqsha atap ótedi. Bul processler tınıshlıq, aǵartıwshılıq, qarım-qatnas, birge islesiw hám rawajlanıw sıyaqlı qádiriyatlarǵa súyengen halda jámiyetti jańalaw, pikir erkinligin keńeytiw hám insan kapitalın rawajlandırıwǵa xızmet etip atırǵanın bildiredi. Xalıqaralıq jámiyetshiliktiń baqlawında Ózbekstannıń ashıq-aydınlıqqa umtılıwı, regionallıq hám globallıq birge islesiwdegi belsendi poziciyası, sistemalı hám konceptuallıq reformaları joqarı bahalanıp atırǵanına itibar qaratadı. Kitapta jaslar máselesine ayrıqsha itibar qaratılǵanı onıń áhmiyetliligin jáne de arttıradı. Jas áwlad Úshinshi Renessanstıń tiykarǵı dóretiwshisi sıpatında kórsetilip, olardıń bilim alıwı, erkin pikirlewi hám watansúyiwshilik ruwxında tárbiyalanıwı rawajlanıwdıń áhmiyetli shárti ekeni tiykarlap berilgen. Bul bolsa hár bir oqıwshını óz aldına úlken maqsetler qoyıwǵa iytermeleydi. Sonday-aq, shıǵarmada milliy qádiriyatlar hám zamanagóy rawajlanıwdıń únlesligi máselesi tereń sáwlelendirilgen.
Avtor milliy miyrastı qásterlep saqlaw menen birge, onı zaman talapları tiykarında rawajlandırıw zárúrligin atap ótedi. Bul qatnas Úshinshi Renessans ideyasınıń bekkem ruwxıy tiykarǵa súyeniwine xızmet etedi. Búgingi jetiskenlikler tiykarında mámleket basshısınıń bekkem erk-ıqrarı, uzaqtı gózlegen strategiyalıq kózqarasları hám reformalarǵa sadıqlıǵı menen bir qatarda puqaralıq jámiyeti institutlarınıń belsendiligi, xalqımızdıń awızbirshiligi turǵanı, erteńgi kúnimiz ushın juwapkershilik hám rawajlanıwǵa bolǵan isenim mámleketimiz rawajlanıwınıń hár bir basqıshında tiykarǵı faktor bolıp xızmet etip atırǵanın atap ótedi.
Juwmaqlap aytqanda, “Ózbekstan: Úshinshi Renessans – rawajlanıw koncepti” kitabı jámiyette jańasha pikirlewdi qáliplestiriw, puqaralardıń sociallıq belsendiligin arttırıw hám keleshekke isenim ruwxın bekkemlewde úlken áhmiyetke iye. Bul shıǵarma hár bir watanlasımızdı mámlekettiń rawajlanıwına baylanıslı ekenin ańlawǵa, óziniń bilim hám potencialı menen Úshinshi Renessanstıń qurılısına úles qosıwǵa shaqıradı.

Gúljan Xalmuratova,
Oliy Majlis Nızamshılıq palatasınıń deputatı, ÓzLiDeP frakciyasınıń aǵzası.
Qaraqalpaqstan xabar agentligi