Ózbekstan mámleketlik denetárbiyası hám sport universiteti Nókis filialı jaslar arasında sport arqalı doslıq hám awızbirshilikti bekkemlew maqsetinde Ábiw Rayxan Beruniy atındaǵı Úrgenish mámleketlik universiteti menen birgelikte «Sport – doslıq elshisi» súreni menen sporttıń mini-futbol, badminton, stol tennisi hám shaxmat túrlerinen doslıq turniri ótkerildi.

Onda dáslep filialdıń sporshı studentleri Beruniy atındaǵı Úrgenish mámleketlik universiteti tárepinen saltanatlı túrde kútip alındı.
Student-jaslar arasında salamat turmıs tárizin úgit-násiyatlaw, milletleraralıq tatıwlıq hám doslıqtı bekkemlew, sport arqalı awızbirshilik ruwxın jáne de joqarılatıw maqsetinde shólkemlestirilgen jarıstıń ashılıw máresiminde Úrgenish mámleketlik universitetiniń birinshi prorektorı D.Ibadullaev, «Sport klubı» baslıǵınıń orınbasarı M.Rahimov hám filial direktorınıń Jaslar máseleleri hám ruwxıy-aǵartıwshılıq isleri boyınsha birinshi orınbasarı G.Xojametov jarıs qatnasıwshılarına áwmetler tiledi.
Jarıs qızǵın bellesiwlerge tolı bolıp, onda eki joqarı oqıw orınlarınıń studentleri tárepinen tayarlanǵan koncert baǵdarlaması da qoyıp berildi.

Adilbay Orazov,
Qaraqalpaqstan xabar agentligi sholıwshısı.