Kegeyli rayonı Júzimbaǵ awıl puqaralar jıyını aymaǵında «Máhálle servis kompaniyası»nıń jańa imaratı qurıp pitkerilip, saltanatlı túrde paydalanıwǵa tapsırıldı.

Servis kompaniyasınıń ashılıw máresiminde Kegeyli rayonı hákimi A.Kamalov hám Ózbekstan Máhálleleri awqamı Qaraqalpaqstan Respublikası basqarmasınıń baslıǵı S.Turmanov qatnasıp, jıynalǵanlardı usı áhmiyetli waqıya menen qutlıqladı.
Ilajda shıǵıp sóylewshiler tárepinen máhálle servis kompaniyaların rawajlandırıw arqalı orınlarda sociallıq-ekonomikalıq mashqalalardı jedel sheshiw hám sol arqalı xalıqqa kórsetilip atırǵan xızmetlerdiń sapasın arttırıw zárúrligi atap ótildi.
– Bul joybar Ózbekstan Respublikası Prezidentiniń 2024-jıl 25-iyundegi “Máhállelerdi abadanlastırıw, kóklemzarlastırıw hám kelbetin túp-tiykarınan jaqsılawǵa baylanıslı qosımsha ilajlar haqqında”ǵı qararına muwapıq ámelge asırıldı, – deydi Júzimbaǵ awıl puqaralar jıyını baslıǵı Azizbek Qudaynazarov. – Jańadan shólkemlestirilip atırǵan bul servis kompaniyası aymaǵımızda jasawshı 1032 xojalıqqa 11 túrdegi xızmetlerdi kórsetedi. Atap aytqanda, úylerdiń ishi, sırtın sıbaw, boyaw, kepserlew, santexnika, jerlerdi shúdigarlaw, tereklerdi kesiw hám putaw, shóplerdi orıw hám basqa da xızmetlerdi kórsetedi. Álbette, bul aymaq xalqınıń mashqalaların jeńilletiw menen birge, xalıqtıń bántligin támiyinlewde oǵada áhmiyetli boldı.
Sońınan ilaj qatnasıwshıları jańa servis kompaniyasınıń ishki imkaniyatları menen jaqınnan tanısıp, ondaǵı jaratılǵan sharayatlardı joqarı bahaladı.

Adilbay Orazov,
Qaraqalpaqstan xabar agentligi sholıwshısı.