Mine toǵız jıldan berli, Prezident Shavkat Mirziyoevtiń baslaması menen Ózbekstanda alıp barılıp atırǵan jedel jańalanıw processleri, ásirese, ruwxıy-aǵartıwshılıq tarawlardaǵı reformalar dúnya jámiyetshiliginde úlken qızıǵıwshılıq oyatıp, joqarı dárejede tán alınbaqta.

Paytaxtımızdaǵı Ózbekstan Milliy kitapxanasında pakistanlı jazıwshı, jurnalist Muhammad Abbos Xannıń “Ózbekstan: Úshinshi Renessans – rawajlanıw koncepciyası” atamasındaǵı kitabınıń prezentaciyasında bul tárepler jáne bir márte óziniń ayqın kórinisin taptı.
Bul ilajda Pakistan Islam Respublikası húkimeti aǵzaları, Ózbekstan Respublikası Prezidenti Administraciyası, ministrlikler, uyımlar, mámleketlik emes kommerciyalıq emes shólkemler, ǵalaba xabar quralları, elimizde jumıs alıp barıp atırǵan diplomatiyalıq korpus wákilleri, ilim, mádeniyat hám kórkem óner, ádebiyat tarawınıń ǵayratkerleri qatnastı.
Ózbekstan Respublikası Prezidentiniń keńesgóyi Xayriddin Sultanov keyingi jılları Ózbekstanda Prezident Shavkat Mirziyoevtiń baslaması tiykarında ámelge asırılıp atırǵan túpkilikli unamlı ózgerisler, ásirese, ruwxıy-aǵartıwshılıq tarawlardaǵı jańalanıw processleri, olardıń tek ǵana Watanımız emes, al regionnıń rawajlanıwına kórsetip atırǵan unamlı tásiri, jańa Ózbekstannıń jedel rawajlanıw qádemleri xalıqaralıq kólemde ayrıqsha húrmet hám itibarǵa iye bolıp atırǵanı haqqında hár tárepleme sóz etti. Bul ózgerisler Ózbekstanǵa onıń óz perzentindey qatnasta bolǵan pakistanlı jurnalist hám jazıwshı Muhammad Abbas Xannıń “Ózbekstan: Úshinshi Renessans – rawajlanıw koncepciyası” atamasındaǵı kitabında oǵada qızǵın, real, qalıs, ádil túrde sáwlelengeni dıqqatqa ılayıq.
Ózbekstan Ilimler akademiyası Tariyx institutınıń direktorı, Oliy Majlis Senatınıń Ilim, bilimlendiriw hám densawlıqtı saqlaw máseleleri komitetiniń aǵzası Azamat Ziyo, Pakistan Islam Respublikası Prezidentiniń Baspasóz xatkeri hám ǵalaba xabar quralları menen birge islesiw boyınsha keńesgóyi Murtazo Solangi, Pakistan Islam Respublikası Bas ministriniń sawda hám sanaat máseleleri boyınsha koordinatorı Rana Ixsaan Afzal Xan, Ózbekstan Respublikası Ilimler akademiyasınıń vice-prezidenti Bahrom Abduhalimov, Pakistan Islam Respublikasınıń Ózbekstandaǵı Ayrıqsha hám tolıq huqıqlı elshisi Faruk Ahmad, Ózbekstan Jazıwshılar awqamınıń baslıǵı Sirojiddin Sayyid hám basqalar Muhammad Abbas Xannıń bul kitabı haqqında hár tárepleme sóz etti.
Bul kitap 2025-jılı urdu tilinde pakistanlı jurnalist hám jazıwshı tárepinen kórkem-publicistikalıq janrda jazılǵan.
Muhammed Abbas Xan Pakistan Islam Respublikasınıń “Daily Ittehad” gazetasınıń Ózbekstan hám Oraylıq Aziya mámleketlerindegi arnawlı xabarshısı bolıp esaplanadı. Avtordıń atap ótiwinshe, shıǵarmada dúnya kólemindegi mámleketlik hám siyasiy ǵayratker Shavkat Mirziyoev tárepinen alǵa qoyılǵan Úshinshi Renessans tiykarın jaratıw ideyası aǵartıwshılıq, tınıshlıq hám qarım-qatnas sıyaqlı qádiriyatlarǵa tiykarlanǵan ullı ózgerisler joybarı ekeni kórsetip berilgen. Ol, sonday-aq, insaniyattı birge islesiwge shaqırıw, tınıshlıq hám qarım-qatnas sıyaqlı qádiriyatlarǵa tiykarlanǵan ullı ózgerisler joybarı, waqıtqa boysınbaytuǵın máńgi ideyalardan biri sıpatında talqılanǵan.
Bul shıǵarmaǵa Pakistan Bas ministri mırza Muhammad Shahboz Sharif kiris sóz jazıp, kitap “adamzat civilizaciyasınıń keleshektegi rawajlanıwın tereń ańlap jetiwge qaratılǵan izleniw hám oy-pikirlerdi ózinde jámlegen shıǵarma” ekenin atap ótedi. “Bul kitap qádirli dostım, Ullı Mártebeli Mırza Shavkat Mirziyoev tárepinen alǵa qoyılǵan Ózbekstanda Úshinshi Renessans tiykarın jaratıw baslamasın, onıń ideyalıq koncepciyasın tereńirek ańlawǵa járdem beredi. Ózbek xalqınıń ullı ata-babalarınıń ruwxıy miyrasına súyenetuǵın bul ullı ideya pútkil insaniyattıń abadan keleshegine xızmet etiwi gúmansız” – dep kórsetip ótedi.
Pakistan Bas ministri Ózbekstan tájiriybesi Pakistandı da keleshekte ullı jańalanıwlarǵa, iygilikli umtılıslarǵa ilhamlandıratuǵınına, kitap, sózsiz, insaniyattıń keleshegi, aǵartıwshılıqtıń qádir-qımbatı hám jańa pútkil jer júzilik gumanizmdi qáliplestiriwde Shıǵıstıń tutqan áhmiyetli ornın jáne de ayqın kórsetip, keleshektegi ullı rejelerge óz úlesin qosatuǵınına isenim bildiredi.
Bul Pakistan mámleketi hám xalqınıń Prezidentimizdiń ideyaları hám xalıqlar arasında birge islesiw jáne qáwipsizlikti támiyinlewge qaratılǵan globallıq kólemdegi bir qatar baslamalardıń da joqarı tán alınıwı bolıp esaplanadı.
Prezident Shavkat Mirziyoevtiń “Sawaplı is jaqsı niyetten baslanadı”, degen sózleri, avtor tárepinen “shın mánisindegi ózgerisler insannıń jaqsılıq hám ádillikke xızmet etiw tileginen baslanadı”, dep tallanǵan hám kitaptıń filosofiyalıq tiykarın quraǵanın atap ótiw kerek.
Bul shıǵarmada mámleketimiz basshısınıń adamgershilikke tiykarlanǵan jańasha pikirlewi sáwlelendirilgen. “Meniń pikirimshe, – dep jazadı Muhammed Abbas Xan óz shıǵarmasında, – adamzat tariyxında mámleket yamasa imperiyanıń bar bolıwınan da turaqlıraq nárse bar. Bul – ullı ideyalar. Olar tariyxtıń baǵdarın ózgertip, keleshekti qáliplestire alatuǵın qúdiretli kúsh bolıp esaplanadı. Mine, usınday ideyalardan biri – Ózbekstan Prezidenti Shavkat Mirziyoevtiń mámlekette Úshinshi Renessans tiykarın jaratıw ideyası, dep bilemen. Sebebi, Úshinshi Renessans ideyası – waqıtqa boysınbaytuǵın máńgi ideya bolıp esaplanadı. Meniń názerimde bul ideya insan oy-pikiriniń teńsiz okeanına quyılatuǵın qúdiretli dáryaǵa uqsaydı. Meniń pikirimshe, bul ideya tek ǵana Ózbekstan keleshegi ushın tiykar emes, al jańa, jáne de úylesimli hám nátiyjeli dúnyanı qáliplestiriwdiń innovaciyalıq modeli bolıp esaplanadı”.
Bul kitap oqıwshını tereń pikirlewge shaqıradı. Onda mámleketimiz basshısınıń “tariyx diywal emes, al kópirge, keleshek bolsa báseki emes, al birge islesiw maydanına aylanadı”, degen pikirleri anıq mısallar hám turmıslıq waqıyalar arqalı bildirilgen.
Shıǵarmada, sonıń ishinde, Ózbekstannıń milliy mámleketshilik rawajlanıwınıń úsh mıń jıldan aslam tariyxıy tájiriybesine baylanıslı bir qatar mısallar keltiriledi.
Kitaptıń dáslepki prezentaciyası usı jıldıń oktyabr ayında Islamabadta bolıp ótti. Ilajda Pakistan Islam Respublikası Prezidenti Administraciyası hám Húkimeti aǵzaları, belgili siyasattanıwshı hám ilimpazlar, analitikler, ǵalaba xabar qurallarınıń wákilleri qatnastı.
Onda “Ózbekstan: Úshinshi Renessans – rawajlanıw koncepciyası” dep atalǵan bul shıǵarma, sózsiz, tek ǵana óz-ara túsinisiw deregi emes, al Ózbekstanda ámelge asırılıp atırǵan reformalardı tereń ańlaw gilti bolıp xızmet etetuǵını atap ótildi.
Pakistanlı siyasatshı hám ilimiy ekspertlerdiń pikirinshe, jazıwshı Muhammad Abbas Xan tárepinen jazılǵan bul shıǵarma hám onda kóterilgen pikir hám talqılawlar tek ǵana Pakistanda emes, al Evropa hám basqa da mámleketlerde joqarı bahalanbaqta.
Házirgi waqıtta “Ózbekstan: Úshinshi Renessans – rawajlanıw koncepciyası” kitabı ózbek tilinde de basıp shıǵarıldı.
– Men kóp jıllardan berli Ózbekstanda jasayman, – dedi pakistanlı jazıwshı hám jurnalist Muhammad Abbas Xan. – Onıń xalqı menen turaqlı baylanıstaman. Bul elde bolıp atırǵan jedel reformalar meni oǵada ilhamlandıradı. Ózbekstanda úlken unamlı ózgerisler júz bermekte hám olar óziniń nátiyjesin kórsetpekte. Bul reformalar tek ǵana Ózbekstanda emes, al sırt elde de tán alınbaqta.
Ilajda Muhammad Abbas Xannıń kitabı, sońǵı jıllarda Ózbekstanda bolıp atırǵan ullı ózgerisler, turmısta óz kórinisin tawıp atırǵan iygilikli ideya hám baslamalar, Ózbekstan hám Pakistan arasındaǵı tariyxıy doslıq baylanısları haqqında hár tárepleme sóz etildi.
Ilajda Ózbekstan Respublikası Prezidenti Administraciyası Kommunikaciyalar departamentiniń basshısı – Ózbekstan Respublikası Prezidentiniń Baspasóz xatkeri Sherzod Asadov qatnastı.

Nazokat Usmonova,
ÓzA