Bársheńizge málim, usı jıldıń 8-13-dekabr kúnleri Hindstannıń Nyu-Dehli qalasında YuNESKOnıń materiallıq emes mádeniy miyras boyınsha húkimetler aralıq komitetiniń 20-sessiyası ótkerilmekte.

Bul sessiya respublikamız xalqı ushın áhmiyetli waqıyalarǵa bay bolıp, xalqımızdıń dóretiwshilik mádeniyatı, turaq jay qurıw hám arxitekturalıq bilimlerin ózinde jámlegen Qaraúy (otaw) YuNESKOnıń materiallıq emes mádeniy miyrasınıń REPREZENTATIV dizimine, “Qobız soǵıw hám atqarıwshılıq óneri” bolsa YuNESKOnıń materiallıq emes mádeniy miyrasın jedel qorǵaw dizimine kirgizildi.
«Qırǵız, Qazaq hám Qaraqalpaq otawların qurıwǵa baylanıslı dástúriy bilim hám kónlikpeler» YuNESKOnıń materiallıq emes mádeniy miyrasınıń REPREZENTATIV dizimine kirgizilgeni pútkil xalqımızdı, ásirese úyshi ustalarımızdı úlken quwanıshqa bólemekte.
Qaraúy qaraqalpaq xalqınıń dóretiwshilik mádeniyatın, turaq jay qurıw hám arxitekturalıq bilimlerin jámlengen, áwladtan-áwladqa ótip kiyatırǵan mádeniy miyrası ekenligin atap ótiwimiz kerek. Qaraúy 6, 8, 12 qanatlı bolıp, basqa xalıqlardıń otawlarınan ayrıqshalanıp turadı.
Bunday jetikenliklerde úrp-ádet dástúrlerimizdi, ata-babalarımızdan miyras bolıp kiyatırǵan ustashılıq ónerin qásterlep-saqlap áwladtan-áwladqa jetkerip kiyatırǵan ustalarımızdıń ornı ayrıqsha.
Ɵzbekstan Saӯda-sanaat palatası Qaraqalpaqstan Respublikası basqarması tárepinen Shımbay rayonında bir neshe jıldan berli qaraúy soǵıӯ kásibi menen shuǵıllanıp kiyatırǵan jeke isbilermen Nurman Ismaylovtıń jumısların ǵalaba xabar quralları arqalı keń jámiyetshilikke tanıstırıӯ maqsetinde ѳnermenttiń jumısları, jetiskenlikleri boyınsha maǵlıӯmatlar berildi.
Otız jıldan berli “Ónerment” associaciyası Qaraqalpaqstan bóliminiń aǵzası bolıp kiyatırǵan N.Ismaylov milliy dástúrlerimizge ámel etken halda, ata-babalarımızdan miyras bolıp kelgen joqarı óner – qaraúy tayarlaw kórkem ónerin múnásip dawam ettirip kelmekte.
Ol óz jumısın 1990-jılı ákesi, qaraúy soǵıw boyınsha belgili ónerment Jańabay Ismaylovtıń shákirti sıpatında baslaǵan. Usta ákesiniń miynet súygishligin, sheberlik hám kórkem ónerge bolǵan sadıqlıǵın ózine órnek etip, 1994-jıldan baslap jeke tártiptegi isbilermen (ónerment) sıpatında jumıs baslap, búgingi kúnge shekem ol qaraúy soǵıwdıń sırların respublikamızdaǵı talantlı shákirtlerine úyretip kelmekte.
N.Ismaylovtıń soqqan qaraúyleri sırt elli kórkem óner ıqlasbentleri tárepinen de joqarı bahalanıp, dúnya júzi boylap keń itibarǵa iye bolmaqta. Ol hár bir jumısında milliy dástúr, kórkem bezew, jetik forma hám kórinislerdi úylestirgen halda, elimizdiń áyyemgi qol miyneti dástúrlerin qásterlep saqlap, olardı keyingi áwladqa jetkeriwdi óziniń turmıslıq wazıypası, dep biledi.
N.Ismaylov hár jılı “Ónerment” associaciyasınıń aǵzası sıpatında tayarlaǵan qaraúyleri menen respublika kólemindegi iri ilajlarda – “Nawrız”, “Ǵárezsizlik” bayramlarında, aymaqlıq tarmaqlar aralıq sanaat yarmarkalarında hám xalıqaralıq tańlawlarda belsene qatnasıp kelmekte.
Onıń miyneti múnásip bahalanıp, bir qatar sıylıqlarǵa iye bolǵan. “Tashabbus-2002”, “Tashabbus-2008” tańlawınıń Qaraqalpaqstan Respublikalıq basqıshında “Eń jaqsı ónerment” baǵdarı jeńimpazı, al “Tashabbus-2015” tańlawınıń Qaraqalpaqstan Respublikalıq basqıshında 2-orındı iyelegen. Sonday-aq, 2008-jılı Moskva qalasında ótkerilgen xalıqaralıq tańlawǵa, 2015-jılı Tashkent qalasındaǵı tańlawǵa, 2024-jılı Qazaqstan Respublikasında ótkerilgen xalıqaralıq tańlawǵa qatnasqan.
N.Ismaylov úlgili shańaraq baslıǵı, pidayı hám tınımsız izleniwshi sheber ustaz sıpatında awıl xalqı hám miynet jámááti arasında úlken húrmetke iye. Onıń miyrim-shápááti, adamgershiligi, ónerge sadıqlıǵı hám xalıq ámeliy kórkem ónerin qásterlep saqlawdaǵı úlesi joqarı bahalanadı.

Á.Jiyemuratov,
Qaraqalpaqstan xabar agentligi.
M.Habibullaevtıń túsirgen súwretleri