Paytaxtımızda qurılǵan Olimpiada qalashası xalqımızdıń joqarı dóretiwshilik potencialı hám ózbek sportınıń úlken tabıslarına tiykar boladı.

Mámleketimizge rásmiy sapar menen kelgen Paragvay Respublikası Prezidenti Santyago Penya 12-dekabr kúni arxitekturalıq jaqtan jetik, dúnya standartlarına sáykes eń aldınǵı innovaciyalıq sheshimlerdi ózinde jámlegen Olimpiada qalashasına bardı.
Joqarı mártebeli miymanǵa Ózbekstan Respublikasınıń sport ministri Adham Ikromov hám Milliy olimpiada komiteti baslıǵınıń birinshi orınbasarı Otabek Umarov basshılıq etti.
Haqıyqatında da, búgin bul kompleks Jańa Ózbekstannıń imkaniyatların tek ǵana Aziya emes, al pútkil dúnyaǵa kórsetpekte. 2022-jıl 9-noyabr kúni Ózbekstan Respublikası Prezidenti Shavkat Mirziyoev qalasha qurılısına tırnaq tasın qoyǵan edi. Ulıwma maydanı 100 gektardan aslam bolǵan komplekste jeńil atletika hám futbolǵa qánigelesken stadion, hár qıylı sport jarıslarına mólsherlengen jabıq hám ashıq imaratlar qurıldı.
Qalasha ishinde quyash panelleri ornatıldı hám olar kompleks maydanın elektr energiyası menen támiyinleydi. Elektromobillerdi quwatlaw ushın da bándirgiler shólkemlestirildi.
Bul jerde velosiped jarısları, stol tennisi, qılıshlasıw boyınsha jarıslar hám shınıǵıwlar ótkeriw imkaniyatları jaratıldı. 12 mıń orınlıq stadionda jasıl maydan hám 9 qatarlı juwırıw jolında jeńil atletikanıń 48 baǵdarı boyınsha jarıs hám saltanatlı máresimler ótkeriw múmkin.
Suw sportı sarayında júziw hám suwǵa sekiriw basseynleri, basseyn hám trenajyor zalları bar. Komandalıq sport kompleksinde bolsa voleybol, basketbol hám gandbol boyınsha shınıǵıwlar hám xalıqaralıq jarıslardı ótkeriw múmkin. Jeke gúresler kompleksi dzyudo, boks, taekvondo sıyaqlı sport túrlerin rawajlandırıwǵa tiykar boladı.
Paragvay Respublikası Prezidenti Santyago Penya Olimpiada qalashasında jaratılǵan sharayatlar menen tanısıp, mámleketimizde sportqa bolǵan itibardıń qanshelli joqarı ekenine shın mánisinde isenim bildirdi.
Dúnya sport saxnasında Ózbekstan bayraǵınıń kóterilip atırǵanına sebep bolıp atırǵan imkaniyatlardıń tiykarı nelerde ekenligine itibar qaratıp, Ózbekstan jasları bunday itibarǵa múnásip bolıp bara beretuǵının atap ótti.

Abdulaziz RUSTAMOV,
Nosirjon HAYDAROV (súwret),
ÓzA