Senattıń Jaslar, hayal-qızlar, mádeniyat hám sport máseleleri komitetiniń aǵzası Malika Kadirxanova Ózbekstan Respublikası Prezidenti janındaǵı Mámleketlik siyasat hám basqarıw akademiyasında hayal-qızlardıń ádillikke teńdey kiriwin támiyinlew máselesine baǵıshlanǵan joqarı dárejedegi ushırasıwda qatnastı.

Ilaj 2026-jılı ótkeriletuǵın Hayal-qızlar statusı boyınsha komissiyanıń 70-sessiyasına aymaqlıq tayarlıq procesiniń áhmiyetli basqıshı boldı.
Ushırasıw Ózbekstan húkimeti hám “BMSh-hayal-qızlar” strukturasınıń Evropa hám Oraylıq Aziya boyınsha Regionallıq ofisi menen birgelikte shólkemlestirilip, onda Ázerbayjan, Qazaqstan, Qırǵızstan, Tájikstan, Túrkmenstan hám Ózbekstan delegaciyaları qatnastı.
Ushırasıwda senator mámleketimizde hayal-qızlardıń ádillikke kiriw imkaniyatların keńeytiw boyınsha ámelge asırılıp atırǵan reformalar, aldınǵı tájiriybe hám nátiyjeler haqqında maǵlıwmat berdi.
Ilaj qatnasıwshıları hayal-qızlardıń huqıqıy qorǵalıwın kúsheytiw, ádillikke múrájat etiwdegi bar tosqınlıqlardı saplastırıw, kemsitiwge qarsı nátiyjeli mexanizmlerdi engiziw, zorlıqtan jábirlengenlerge járdem kórsetiw sistemasın jetilistiriw máselelerin hár tárepleme dodaladı.
Ushırasıw juwmaǵında qatnasıwshı mámleketler hayal-qızlar ushın ádillikke teń imkaniyatlardı támiyinlew baǵdarında óz-ara birge islesiwdi bekkemlewge sadıqlıǵın tastıyıqlawshı Birgeliktegi bildiriw qabıl etildi.

Qaraqalpaqstan xabar agentligi